Londonda 48 yaşlı xəstənin beyin şişinin çıxarılması əməliyyatında süni intellektdən real vaxt rejimində istifadə edilib.
Turkustan.az xəbər verir ki, həkimlər bunun bu texnologiyanın beyin şişi əməliyyatında tətbiq edildiyi ilk uğurlu əməliyyat olduğunu bildiriblər.
Londondakı Milli Nevrologiya və Neyrocərrahiyyə Xəstəxanasında keçirilən əməliyyat zamanı Ris Hibbertin hipofiz vəzisində yerləşən 11 millimetrlik şiş çıxarılıb.
May ayında həyata keçirilən əməliyyat zamanı süni intellekt sistemi cərrahi kameradan alınan görüntüləri real vaxt rejimində təhlil edib. Sistem şişin ətrafındakı qan damarlarını və sinirləri müəyyənləşdirərək, cərrahların zədələməməli olduğu bölgələri ekranda işarələyib.
Şiş Hibbertin görmə sinirlərinə təzyiq göstərərək görmə sahəsinin daralmasına səbəb olub. Həkimlər əməliyyat keçirilmədiyi təqdirdə onun görmə qabiliyyətini tamamilə itirə biləcəyini bildiriblər.
Əməliyyatdan sonra Hibbert görmə qabiliyyətinin əhəmiyyətli dərəcədə yaxşılaşdığını bildirib. O, təxminən bir həftə sonra eynək və ya digər yardımçı vasitələr olmadan hərəkət edə bilib və daha sonra işinə qayıdıb.
Tədqiqatçılar vurğulayıblar ki, süni intellekt cərrahların qərarlarını əvəz etmir, əməliyyat zamanı əlavə “ekspert gözü” kimi fəaliyyət göstərir. Sistem yüzlərlə beyin şişi əməliyyatından əldə edilən görüntülər əsasında öyrədilib.
Aytən Yaşar/ Turkustan.az
