ABŞ-ın Arizona ştatında yerləşən Davis-Monthan aviabazası dünyanın ən böyük istismardan çıxarılmış hərbi təyyarə "qəbiristanlığı” hesab olunur. Burada hələ də minlərlə köhnə hərbi təyyarə saxlanılır, onların təxminən 1000-i II Dünya müharibəsi və Vyetnam müharibəsi dövrlərinə aiddir.
Turkustan.az xəbər verir ki, "Supercar Blondie" nəşrinin məlumatına görə, bu ərazi təxminən 10 kvadrat kilometr sahəni əhatə edir və burada ümumi dəyəri 34 milyard dollara yaxın olan təxminən 4000 təyyarə və aviasiya hissəsi mövcuddur.
Bütün "qəbiristanlıq” görüntüsünə baxmayaraq, baza aktiv şəkildə fəaliyyət göstərir. Burada təxminən 800 əməkdaş çalışır və onların arasında həm hərbi, həm də mülki mütəxəssislər var.
Onların işi təkcə köhnə təyyarələrin saxlanması ilə məhdudlaşmır. Burada həmçinin təmir, bərpa və texniki xidmət həyata keçirilir. Bir çox istismardan çıxarılan təyyarə isə ehtiyat hissələri üçün sökülür və ABŞ hərbi aviasiyasının mövcud parkının saxlanmasına yönəldilir.
Beləliklə, baza faktiki olaraq ABŞ ordusu üçün nəhəng aviasiya ehtiyat və bərpa mərkəzi kimi fəaliyyət göstərir.
Məlumatlara görə, istismardan çıxarılan təyyarələrdən alınan ehtiyat hissələri ABŞ ordusuna ildə təxminən 500 milyon dollar qənaət etməyə imkan verir. Obyektə 309-cu Aerokosmik texniki xidmət və regenerasiya qrupu rəhbərlik edir. Bu bölmə avadanlığın konservasiyası, təmiri və bərpasına cavabdehdir.
Bu yerin seçilməsinin əsas səbəblərindən biri regionun iqlimidir. Quru hava və səhra torpağı korroziya və paslanmanı minimuma endirir ki, bu da köhnə təyyarələrin uzun müddət saxlanması üçün ideal şərait yaradır. Bununla belə, hətta belə şəraitdə də 60–70 il əvvəl istehsal olunmuş bəzi təyyarələr mütəmadi texniki baxışdan keçirilir.
Saxlanılan təyyarələrin bir hissəsi gələcəkdə muzey eksponatına çevriləcək, digərləri isə ehtiyac yaranarsa yenidən bərpa edilərək uçuşa qaytarıla bilər. /Qaynarinfo/
