Diabet xəstələri üçün doğru meyvə seçimi qan şəkərini nəzarətdə saxlamaq və ürək-damar xəstəlikləri riskini azaltmaq baxımından böyük əhəmiyyət kəsb edir.
Turkustan.az xəbər verir ki, dietoloqların fikrincə, qan şəkərinin səviyyəsini tənzimləməyə kömək edən ən faydalı 5 meyvə bunlardır:
1. Giləmeyvələr (Qaragilə, Moruq, Böyürtkən və Zoğal)
"Health.com" nəşrinin məlumatına görə, giləmeyvələr yeməkdən sonra insulin sıçrayışlarının qarşısını almağa kömək edir. Liflə zəngin olan bu meyvələr şəkərin qana sorulmasını yavaşladır.
Faydaları: Tərkibindəki vitaminlər, minerallar və antioksidantlar hesabına iltihab əleyhinə təsir göstərir.
Şəkərə təsiri: Xüsusilə qaragilə və zoğal acqarına qan şəkərini, eləcə də son 2–3 ayın şəkər göstəricisini əks etdirən HbA1c səviyyəsini əhəmiyyətli dərəcədə aşağı salır.
Ümumi profilaktika: Diabetlə yanaşı ürək xəstəlikləri, hipertoniya və bəzi xərçəng növlərinin yaranma riskini azaldır.
2. Nar
Nar dənələri və nar şirəsi ellagitannin, antosiyanin və üzvi turşular kimi zəngin maddələrlə doludur.
Faydaları: 2-ci tip diabet xəstələrində sistolik və diastolik qan təzyiqini, xolesterol səviyyəsini aşağı salır və insulin həssaslığını artırır.
3. Alma
Almanın qlikemik indeksi aşağıdır və həll olunan liflərlə zəngindir. Orta ölçülü bir almada təxminən 4 qram lif var ki, bu da şəkərin qana keçməsini ləngidir.
Elmi fakta əsasən: 2022-ci ildə aparılan araşdırma göstərib ki, qlükoza dözümsüzlüyü olan şəxslər əsas yeməkdən (məsələn, düyüdən) əvvəl alma yedikdə, yeməkdən sonrakı qan şəkəri səviyyəsi nəzərəçarpan dərəcədə daha aşağı olur.
4. Sitrus Meyvələri (Portağal və Qreypfrut)
Sitrus meyvələri aşağı qlikemik indeksə (Qİ) malikdir (məsələn, portağalın Qİ göstəricisi 43-dür; 55-dən aşağı göstəricilər aşağı Qİ hesab olunur).
Faydaları: Müntəzəm istifadə olunduqda HbA1c səviyyəsini, qan təzyiqini və ürək xəstəliyi riskini azaldır.
Antidiabetik xüsusiyyət: Tərkibindəki naringenin adlı polifenol-antioksidant güclü antidiabetik təsirə malikdir.
5. Avokado
Avokadonun tərkibində karbohidrat miqdarı çox azdır, lakin o, tək doymamış yağlar və liflə zəngindir.
Faydaları: Bu sağlam Yağlar 2-ci tip diabet xəstələrində qan şəkərinin daha yaxşı idarə olunmasını təmin edir, yeməkdən sonra şəkərin qəfil yüksəlməsinin qarşısını alır və çəkiyə nəzarətə kömək edir.
Aytən Yaşar/ Turkustan.az
