ABŞ-ın Nyu-Meksiko ştatının Baş Prokurorluğu “Meta Platforms” şirkətinə qarşı 40 milyard dollara qədər cərimə tətbiq edilməsini tələb edib.
Turkustan.az xəbər verir ki, məhkəmənin münsiflər heyəti “Meta”nın ştat qanunlarını 43 milyondan çox dəfə pozduğunu müəyyən edib.
Nyu-Meksiko Baş Prokurorluğu çərşənbə axşamı ştat məhkəməsinin hakimindən “Meta”ya qarşı ötən həftə keçirilən tarixi münsiflər məhkəməsindəki qərardan sonra 40 milyard dollara qədər cərimə tətbiq edilməsini istəyib.
Baş Prokurorluq bildirib ki, tələb olunan məbləğ ABŞ hüquq tarixində indiyədək tətbiq edilən ən böyük cərimə ola bilər. Qurum hesab edir ki, cərimə “Meta”nın səhm qiymətinə təsir edəcək qədər yüksək olmalıdır.
Dinləmədə iştirak edən, “Montoya Love Curry & Sievers PA” şirkətini təmsil edən Nyu-Meksiko ştatının vəkili Randi Makginn bildirib:
“Bu məhkəmə Meta ilə onun başa düşdüyü yeganə dildə, yəni pul və səhm qiymətləri ilə danışmalıdır. Sizdən səhm qiymətinə təsir edəcək bir cəza tətbiq etməyinizi xahiş edirəm”.
Dinləmə Nyu-Meksiko Baş Prokuroru Raul Torrezin iki həftəlik məhkəmə prosesindən sonra keçirilib. Prosesdə “Meta”nın ştat sakinlərini nifrət nitqi siyasəti, məlumatların məxfiliyi və bu sahədə verdiyi vədlərlə bağlı yanlış məlumatlandırdığı iddiaları araşdırılıb.
Ötən həftə münsiflər heyəti “Meta”nın ştatın Ədalətsiz Təcrübələr Qanununu 43 milyondan çox dəfə pozduğuna qərar verib.
Aytən Yaşar/ Turkustan.az
