Livan prezidenti Cozef Aun İsraillə danışıqların ölkəsinin cənubla bağlı məqsədlərinə nail olması üçün yeganə yol olduğunu bildirib.
Turkustan.az xəbər verir ki, Livan prezidentliyinin açıqlamasına görə, Aun Livan Maronit Baş Şurasının nümayəndə heyəti ilə görüşündə ölkəsinin cənubdakı məqsədlərinə müharibə yolu ilə nail olmasının mümkün olmadığını deyib.
Aun İsraillə danışıqlar aparmaq qərarının müharibənin yaratdığı dağıntı və faciələrin qarşısını almaq məqsədi daşıdığını bildirib. Onun sözlərinə görə, danışıqlar “maneələr və çətinliklər səbəbindən asan və sürətli deyil, lakin müharibədən daha yaxşı seçimdir”.
Livan prezidenti ölkəsinin əsas məqsədlərinin cənub ərazilərinin azad edilməsi, ordunun sərhədlərdə yerləşdirilməsi, əsirlərin geri qaytarılması, insanların evlərinə qayıtması və ərazilərin yenidən qurulması olduğunu vurğulayıb.
Aun bu məqsədlərə müharibə yolu ilə nail olmağın mümkün olmadığının artıq aydın olduğunu qeyd edərək, “Buna görə də danışıqlardan başqa seçim qalmayıb”, – deyə bildirib.
Aytən Yaşar/ Turkustan.az
