Bakı şəhərinin Səbail rayonunda yerləşən “İvanovka” ticarət obyektində aparılan yoxlamalar kərə yağı adı ilə satılan məhsulların tərkibində ciddi uyğunsuzluqlar olduğunu üzə çıxarıb. AQTA-nın məlumatına görə, satışdan götürülən yağ və süd məhsulları bitki yağları qarışığından ibarət olub və müvafiq sənədlər olmadan realizə edilib. Təkrar laborator sınaqlar isə həm yağlarda saxtalaşdırmanı, həm də kəsmikdə mikrobioloji çirklənməni təsdiqləyib.
Aparılan araşdırmalar göstərir ki, satıcıların kərə yağı adı altında bitki yağlarından ibarət qarışıqları alıcılara “təbii məhsul” kimi təqdim etməsi bazarda saxtakarlığın daha incə üsullarla genişlənməsinə səbəb olur.
Turkustan.az Yeni Sabah-a istinadən xəbər verir ki, mütəxəssislərin sözlərinə görə, istehlakçıların belə halları fərqləndirməsi çətin olsa da, diqqət yetiriləcək bir neçə məqam real kərə yağını tanımağa yardım edə bilər. İlk növbədə, kərə yağı otaq temperaturunda yumşalmalı, lakin tam mayeləşməməlidir. Bitki yağları qarışığı adətən sürətlə ərir və bıçaqla kəsilərkən elastik deyil, daha çox “yayılmış” görünüşə sahib olur.
Qoxu və dad da istehlakçı üçün mühüm göstəricidir. Təbii yağ yüngül süd qoxusu ilə seçilir, bitki yağları isə ya qoxusuz olur, ya da süni ətir vasitəsilə “kərə yağı” effekti yaradılır. Rəngində də fərqlər müşahidə edilə bilər: təbii məhsul adətən açıq sarı tonunda olur, çox tünd və parlaq rəng isə əlavə olunmuş rəngləndiricilərdən xəbər verə bilər. Etiket və sənədləşmə isə ən əsas amillərdən biridir. Məhsulun üzərində istehsalçı, tərkib, yağlılıq dərəcəsi və saxlanma qaydalarının göstərilməsi məcburidir; bu məlumatlar olmayan məhsullar risk qrupuna daxildir.
Mütəxəssislər bildirirlər ki, ev şəraitində sadə sınaq da aparmaq mümkündür: kərə yağı isti suda həll olarkən suda xırda hissəciklər əmələ gətirir, bitki yağı qarışığı isə tamamilə əriyərək bircins maye halı alır. Alıcıların bu əlamətlərə diqqət etməsi saxta məhsulların qarşısını almaqda mühüm rol oynaya bilər.
