Hindistan və Pakistan arasında aktiv döyüş əməliyyatları sona çatsa da, sakitlik uzun çəkməyə bilər. Çünki Hindistanın hədələyici bəyanatları səngimir. Baş nazir Narendra Modi yeni müharibədən dəm vurur və bəyan edir ki, münaqişəyə nöqtə qoyulmayıb. Müharibə əhval-ruhiyyəsində olan baş nazirin bu yanaşması isə bir növ davadan sonra əl-qol atmağa bənzəyir.
Hindistan baş nazirinin təhdidləri
O, Qərbi Benqaliya ştatında çıxışında bildirib: “Benqal torpağında 1,4 milyard hindistanlı adından bəyan edirəm ki, "Sindur" əməliyyatı hələ başa çatmayıb". Modinin sözlərinə görə, ölkəsi terrorizmə qarşı sıfır dözümlülük siyasətini qəbul edib və "əgər indi Hindistana qarşı terror hücumu həyata keçirilərsə, qarşı tərəf bunun üçün yüksək bədəl ödəməli olacaq".
Baş nazirdən geri qalmayan müdafiə naziri Racnath Sinqh isə bildirib ki, son hadisələrə reaksiyaları güclü, lakin təmkinli olub. Xeyli sayda qırıcı təyyarəsi vurulan hindistanlı nazir vurğulayıb ki, “Sindur” əməliyyatı tarazlaşdırılmış, lakin qətiyyətli olub.
Əslində Modi və müdafiə nazirinin son açıqlamaları bölgədə təhlükəsizlik üçün ciddi təhdiddir və onlar bu bəyanatları verməklə daxili siyasi gündəmi manipulyasiya etməyə çalışırlar. Terrora qarşı mübarizə adı altında regional gərginliyi dərinləşdirmək və hərbi əməliyyatlara legitimlik görüntüsü vermək istənilir. Bütün bu proseslər Hindistanın əslində terrora qarşı deyil, bölgədə güc siyasəti və hegemonluq iddialarına qarşı çıxan dövlətlərə qarşı müharibə planladığını göstərir. Halbuki, terror bəhanəsi ilə qonşulara qarşı təcavüz BMT prinsiplərinə və beynəlxalq hüquqa ziddir. Görünən odur ki, Hindistan daxili siyasi problemlərini ört-basdır etmək üçün xarici düşmən obrazı yaratmağa çalışır.
İqtidar nüfuzunu itirir
Hindistan rəhbərliyi uğursuz əməliyyat ilə əhali arasında nüfuzunu itirib. Onlar yenidən etimad qazanmaq üçün seçki öncəsi aqressiv addımlar ata bilərlər.
Xatırladaq ki, Hindistan və Pakistan arasında gərginlik apreldə başlayıb. 22 aprel tarixində "Lashkar-e-Taiba" qruplaşmasının döyüşçüləri mübahisəli Cammu və Kəşmir bölgəsində Pahalqam turizm şəhərində terror aktı törədiblər, nəticədə 25 hindistanlı və 1 nepallı həlak olub. Hindistan heç bir fakt göstərmədən terror aktında Pakistanın kəşfiyyat xidmətini (ISI) günahlandırıb. Təxminən iki həftə ərzində Pakistan və Hindistan arasında söz atışması davam edib. 7 mayda Hindistan hərbi əməliyyatlara başlayıb. Pakistan buna raketlər və pilotsuz uçuş aparatları ilə cavab verib. 10 mayda Pakistan və Hindistan ABŞ-nin vasitəçiliyi ilə danışıqlara başlayıb və atəşkəsə razılaşıblar. Mayın 12-də hərbi əməliyyatlar dayandırılıb.
Hindistan Moskvadan və Qərbdən dəstək umur
Baş verənlər fonunda Yeni Delhi beynəlxalq reaksiyadan narazıdır və böyük oyunçuların dəstəyini qazanmaq istəyir. Bu məqsədlə Moskvaya ölkənin bütün partiyalarını təmsil edən Hindistan deputatlarının qrupu gəlib. Onlar orada iddia ediblər ki, Pakistana zərbələr ədalətli olub. Deputatlar deyiblər ki, Rusiyanın və digər mühüm ölkələrin Hindistanı dəstəkləməsini istəyirlər. Maraqlıdır ki, hindistanlı deputatlar Rusiyadan Avropaya yollanıblar. Yeni Delhinin narahatlıq üçün çox səbəbi var. Belə ki, Avropa ölkələri münaqişə zamanı bərabər məsafəli mövqe tutublar. Donald Tramp isə Hindistan və Pakistan arasında hərbi əməliyyatları, yəni Hindistanın "Sindur" əməliyyatını rüsvayçılıq adlandırıb. Buna görə də Hindistan Rusiya ilə hərbi sövdələşməni davam etdirməyə qərar verib və S-400 "Triumf" ZRK-nin yeni partiyasının alınmasını müzakirə edir. Bəziləri hesab edir ki, qısa müddətdə gərginliyin azaldılması üçün beynəlxalq vasitəçilər (xüsusən ABŞ) işə qoşula bilər. Ancaq münasibətlərin tam normallaşması çətin görünür. Orta müddətdə gərginliyin azaldılması üçün su təhlükəsizliyi məsələsi yeni bir münaqişə cəbhəsi ola bilər. Hindistanın “İndus Suları Müqaviləsi”ni dondurması regionda humanitar böhran yaradarsa, vəziyyət daha da kəskinləşəcək. Ən təhlükəli ssenari isə səhv hesablamalar nəticəsində nüvə eskalasiyasıdır.
Pakistan mövqelərini möhkəmləndirir
Pakistan da mövqelərini möhkəmləndirməyə çalışır. İslamabad Ankara ilə əlaqələrini gücləndirir. Baş nazir Məhəmməd Şahbaz Şərif İran, Türkiyə və Azərbaycana səfərlər edib, onlara dəstəklərinə görə təşəkkürünü bildirib. Türkiyə və Pakistan enerji, hərbi-sənaye kompleksində əməkdaşlığı artırmaq, Azərbaycanla birlikdə Orta Dəhlizi inkişaf etdirmək barədə razılıq əldə ediblər. Bu planlar Pakistanın ənənəvi müttəfiqi olan Çini də qane edir.
Pakistan Hərbi Dəniz Qüvvələri (HDQ) Hava Müstəqil Hərəkət (AIP) texnologiyası sahəsində Hindistanı qabaqlayaraq, böyük addım atıb. 2030-cu illərdə istifadəyə veriləcək “Hangor” sinfinə məxsus sualtı qayıqlar Pakistanın sualtı qayıq parkını gücləndirəcək. Pakistan HDQ son illərdə AIP texnologiyasını mənimsəmək məsələsində Hindistanı geridə qoyub. Hindistan P-75 “Scorpene” layihəsi çərçivəsində altıncı və sonuncu sualtı qayığını parkına qatsa da, texnologiya baxımından Pakistandan geri qalır. Hindistan HDQ-nin müasir texnologiya ilə təchiz edilmiş heç bir sualtı qayığı yoxdur. Halbuki Pakistan artıq öz HDQ-sinə Fransa istehsalı olan 3 ədəd “Agosta-90B” sinfinə məxsus sualtı qayığı daxil edib. ("Kaspi" qəzeti)
