Dünyada xəritədə yerini asanlıqla tapa biləcəyiniz, lakin adi ziyarətçilərin daxil olmasına ciddi məhdudiyyət qoyulan bölgələr var. Bəziləri təhlükəli canlılar, bəziləri qorunan tarixi abidələr, digərləri isə yüksək təhlükəsizlik tədbirləri səbəbindən ictimaiyyət üçün bağlıdır.
Turkustan.az xəbər verir ki, Braziliyadakı İlan adasından Çindəki imperator Qin Şi Huandinin açılmamış məzarına, Kiprdəki BMT-nin bufer zonasından ABŞ-dakı Fort-Knox qızıl anbarına qədər bu yerlər həm təhlükələri, həm də sirli tarixləri ilə diqqət çəkir.
İLAN ADASI
Yerləşdiyi ölkə: Braziliya
Braziliya sahillərində yerləşən Ilha da Queimada Grande daha çox İlan adası kimi tanınır. Ada dünyanın ən zəhərli ilanlarından biri hesab edilən qızıl nizəbaşlı gürzələrin sıx məskunlaşdığı ərazilərdən biridir.
Bu ilanların zəhəri güclüdür və dişləmələri ciddi toxuma zədələnməsinə səbəb ola bilər. Adanın bəzi hissələrində hər kvadratmetrə bir ilanın düşdüyü barədə məlumatlar yayılıb.
İnsan həyatı üçün təhlükə yarada biləcəyi üçün Braziliya hökuməti adaya səfərləri ciddi şəkildə məhdudlaşdırır. Elmi-tədqiqat məqsədilə adaya gedən qrupların isə mümkün ilan sancmalarına qarşı tibbi yardım imkanına malik olması tələb olunur.
Buna baxmayaraq, bəzi araşdırmaçılar və kontent yaradıcıları xüsusi icazə və mütəxəssislərin müşayiəti ilə adaya səfər ediblər. Ada dünyanın ən təhlükəli və girişin məhdudlaşdırıldığı ərazilərindən biri olaraq tanınır.
BMT-NİN BUFER ZONASI
Yerləşdiyi yer: Kipr
Kiprdə 1974-cü ildə baş verən qarşıdurmalardan sonra Birləşmiş Millətlər Təşkilatı adanın paytaxtı Lefkoşadan keçən və “Yaşıl xətt” kimi tanınan bufer zonanın nəzarətini üzərinə götürüb.
Təxminən 180 kilometr uzunluğunda olan bu zona Kipr Respublikasının nəzarətində olan cənub hissəsi ilə adanın şimalındakı faktiki idarəetmə xətti boyunca uzanır. Ərazidə mülki şəxslərin hərəkəti ciddi şəkildə məhdudlaşdırılır.
Bufer zonanın bəzi hissələrində tərk edilmiş evlər, mağazalar və zamanla boşalmış yaşayış məntəqələri yerləşir. Buna görə də bəzi ərazilər sanki vaxtın dayandığı məkan təsiri bağışlayır.
Adanın şimalındakı Türk tərəfi Türkiyədən başqa heç bir ölkə tərəfindən müstəqil dövlət kimi tanınmır. Cənub və şimal arasında isə müxtəlif keçid məntəqələri fəaliyyət göstərir.
QİN Şİ HUANDİNİN MƏZARI
Yerləşdiyi ölkə: Çin
Çinin ilk imperatoru Qin Şi Huandinin məzarı 1974-cü ildə Sian şəhəri yaxınlığında işləyən fermerlər tərəfindən aşkarlanıb. Sonrakı arxeoloji qazıntılar zamanı imperatorun məzar kompleksinin ətrafında təxminən 8 min gil əsgər, at, döyüş arabası və digər fiqurlar üzə çıxarılıb.
Bu tapıntılar bütün dünyada “Terrakota ordusu” kimi tanınan məşhur arxeoloji kompleksin ortaya çıxmasına səbəb olub.
Lakin arxeoloqların bütün bu kəşflərinə baxmayaraq, imperatorun əsas məzar otağı hələ də açılmayıb. Çin hakimiyyəti məzarın yerləşdiyi mərkəzi əraziyə girişə icazə vermir.
Qərarın əsas səbəbləri arasında tarixi qalıqların qorunması və mövcud texnologiyanın məzara zərər vermədən təhlükəsiz qazıntı aparmaq üçün kifayət edib-etməməsi ilə bağlı narahatlıqlar göstərilir.
Bundan başqa, məzarın daxilində yüksək miqdarda civənin ola biləcəyi ilə bağlı araşdırmalar da mövcuddur. Bu səbəbdən Qin Şi Huandinin məzarı min illərdir öz sirlərini qoruyan və tam şəkildə araşdırılmamış tarixi məkanlardan biri olaraq qalır.
FORT-KNOX
Yerləşdiyi yer: Kentukki, ABŞ
Bir yerin son dərəcə təhlükəsiz olduğunu ifadə etmək üçün “Fort-Knox qədər təhlükəsiz” deyilməsinin səbəbi var. ABŞ-ın Kentukki ştatında yerləşən Fort-Knox dünyanın ən ciddi mühafizə olunan obyektlərindən biri kimi tanınır.
1936-cı ildə inşa edilən United States Bullion Depository ABŞ-ın qızıl ehtiyatlarının əhəmiyyətli hissəsinin saxlanıldığı obyektlərdən biridir və ictimaiyyət üçün açıq deyil.
Polad və betondan inşa edilən binanın əsas seyfinin qapısının çəkisinin 20 tondan çox olduğu bildirilir. Təhlükəsizlik sistemi isə yalnız fiziki mühafizə ilə məhdudlaşmır.
Seyfə giriş üçün bir neçə şəxsin iştirak etdiyi çoxmərhələli təhlükəsizlik prosedurları tətbiq edilir. Personalın hər bir üzvü təhlükəsizlik sisteminin yalnız müəyyən hissəsinə çıxış əldə edir və seyfə giriş bir nəfərin nəzarətində həyata keçirilmir.
Bu yüksək təhlükəsizlik tədbirləri Fort-Knox-u uzun illərdir dünyanın ən çox maraq doğuran, lakin ictimaiyyət üçün qapalı obyektlərindən birinə çevirib./Musavat.com
