Dünyanın ən məşhur fiziklərindən biri olan Albert Eynşteyn təkcə elmi kəşfləri ilə deyil, qeyri-adi həyat tərzi ilə də yadda qalıb.
Onun haqqında ən çox danışılan maraqlı faktlardan biri isə corab geyinməyi sevməməsi idi. Maraqlıdır ki, Eynşteyn bunun səbəbini özü də izah edib.
Turkustan.az xəbər verir ki, Eynşteyn məktublarından birində yazırdı ki, uşaqlıq illərində corab geyinərkən baş barmağının corabı tez-tez deşdiyini görüb. Buna görə də zaman keçdikcə corab geyinməyin lazımsız olduğunu düşünüb və bu vərdişdən tamamilə imtina edib.
Alimin yaxınları və dövrün fotoşəkilləri də göstərir ki, o, rəsmi tədbirlərdə belə bəzən corabsız ayaqqabı geyinirdi. Hətta şahzadə və dövlət xadimləri ilə görüşlərdə də bu vərdişini dəyişmədiyi bildirilir.
Tarixçilərin fikrincə, Eynşteyn geyimə xüsusi önəm vermirdi. O hesab edirdi ki, gündəlik həyatda xırda seçimlərə az vaxt sərf etmək daha vacib işlərə diqqət ayırmağa kömək edir. Bu baxımdan corab geyinməmək onun sadə həyat tərzinin bir hissəsi idi.
Maraqlıdır ki, Eynşteynin bu qeyri-adi vərdişi illər sonra texnologiya dünyasının tanınmış simaları arasında da fərqli formada özünü göstərib. Məsələn, Steve Jobs və Mark Zuckerberg uzun illər eyni tip geyimlərdən istifadə etməklə gündəlik qərarların sayını azaltmağa çalışdıqlarını bildiriblər.
Bu gün Albert Eynşteynin corab geyinməməsi elmi fəaliyyətinə təsir edən amil kimi deyil, onun fərqli xarakterini və sadəliyə üstünlük verən həyat tərzini əks etdirən maraqlı bioqrafik detal kimi xatırlanır.
