Füzulidə mina və partlamamış hərbi sursatlardan (PHS) zərərçəkmiş şəxslər üçün psixososial dəstək tədbirlərinin yekun mərhələsi keçirilib.
QHT.az xəbər verir ki, layihə çərçivəsində təşkil olunan sonuncu görüş digər təlimlərdən fərqli olaraq daha çox açıq müzakirələrə, özünüifadəyə, emosional paylaşmaya və iştirakçıların psixoloji rahatlamasına həsr olunub.
25 avqust 2026-cı il tarixində “Şəfa Psixoloji Sosial Yardım” İctimai Birliyi tərəfindən həyata keçirilən “Mina və partlamamış hərbi sursatlardan (PHS) zərərçəkmiş şəxslərin psixososial reabilitasiyası və cəmiyyətə reinteqrasiyasına dəstək” layihəsi çərçivəsində 10 nəfərdən ibarət hədəf qrupla “Emosional vəziyyətin yaxşılaşdırılması, streslə mübarizə bacarıqlarının inkişafı və sosial adaptasiyanın dəstəklənməsi” mövzusunda təlim və qrup müzakirəsi keçirilib.
Psixoloq-təlimçi Nəzakət Quliyevanın rəhbərliyi ilə keçirilən görüşdə əsas diqqət iştirakçıların öz hiss və düşüncələrini sərbəst ifadə etmələrinə, yaşadıqları psixoloji gərginliyin daha sağlam yollarla idarə olunmasına və gündəlik həyata uyğunlaşmanı asanlaşdıran bacarıqların möhkəmləndirilməsinə yönəldilib. Özünüifadə, emosiyaların tənzimlənməsi, psixoloji rahatlama və stresin idarə olunması ilə bağlı praktik yanaşmalar iştirakçıların fəal iştirakı ilə müzakirə edilib.
Görüşün ən təsirli məqamlarından biri iştirakçıların öz təcrübələrini bölüşməsi və bir-birini dinləməsi olub. Bəzən insanın yaşadığı ağrını azaltmağın ilk addımı onun tək olmadığını hiss etməsidir. Bu baxımdan qrup müzakirələri iştirakçılara yalnız psixoloji biliklər qazandırmayıb, həm də onları dinləyən, anlayan və dəstəkləyən insanların olduğunu hiss etdirməyə imkan verib.
Təlim zamanı iştirakçıların gündəlik həyatlarında qarşılaşdıqları emosional və sosial çətinliklər ətrafında açıq fikir mübadiləsi aparılıb. Onlara mənfi emosiyaları basdırmaq əvəzinə onları tanımaq, qəbul etmək və idarə etmək, stresli vəziyyətlərdə özünü sakitləşdirmək və sosial münasibətlərdə daha sağlam ünsiyyət qurmaq istiqamətində praktik tövsiyələr verilib.
Layihə rəhbəri, “Şəfa Psixoloji Sosial Yardım” İctimai Birliyinin sədri Xəlil Süleymanov görüşün əvvəlində iştirakçıları layihənin məqsəd və vəzifələri, donor dəstəyi, həyata keçirilən fəaliyyətlər və psixososial dəstək proqramının əsas istiqamətləri barədə məlumatlandırıb. Daha sonra psixoloq-təlimçi Nəzakət Quliyeva iştirakçılara təqdim olunub.
Təqdimat zamanı qeyd olunub ki, 30 ilə yaxın peşəkar psixoloq təcrübəsinə malik Nəzakət Quliyeva uzun illər ərzində müharibənin posttravmatik təsirlərindən əziyyət çəkən şəxslərə və ailələrə psixoloji dəstək göstərib, şəhid ailələri ilə görüşlərdə iştirak edib və onların övladlarına könüllü əsaslarla psixoloji xidmət göstərib.
Yekun görüş çərçivəsində yalnız qrup müzakirəsi ilə kifayətlənilməyib. Psixoloji dəstəyə daha çox ehtiyacı olduğu müəyyən edilən iştirakçılarla fərdi psixoloji seanslar və qrup terapiyası da keçirilib. Bu yanaşma iştirakçıların ehtiyaclarının daha yaxından qiymətləndirilməsinə və onların emosional vəziyyətinə uyğun fərdi dəstək göstərilməsinə imkan verib.
Görüş zamanı iştirakçıların təlimlərdən sonra da psixoloji dəstəklə əlaqələrinin davam etdirilməsi məsələsinə xüsusi diqqət yetirilib. İştirakçılar üçün yaradılmış “WhatsApp” qrupunda psixoloqun iştirakı onların ehtiyac yarandığı halda mütəxəssislə əlaqə saxlamasına və onlayn psixoloji seanslarda iştirakına imkan yaradacaq.
Layihənin başa çatmasından sonra da maarifləndirici görüşlərin və psixoloji dəstəyin mümkün istiqamətlər üzrə davam etdirilməsi nəzərdə tutulur.
Azərbaycan Respublikasının QHT-lərə Dövlət Dəstəyi Agentliyi və Qarabağ Dirçəliş Fondunun birgə qrant müsabiqəsi çərçivəsində maliyyələşdirilən layihənin əsas məqsədi mina və partlamamış hərbi sursatların yaratdığı fiziki, psixoloji və sosial fəsadların aradan qaldırılmasına töhfə vermək, zərərçəkmiş şəxslərin psixoloji dayanıqlığını gücləndirmək, onların sosial həyata fəal inteqrasiyasını dəstəkləmək və ailələrinin psixososial rifahının yaxşılaşdırılmasına kömək göstərməkdir.
Füzulidə keçirilən bu görüşlə layihə çərçivəsində rayonlarda təşkil olunan psixososial dəstək təlimlərinin sonuncu mərhələsi yekunlaşıb. Lakin görüş zamanı da vurğulandığı kimi, layihənin başa çatması psixoloji dəstəyin sonu deyil. Əksinə, məqsəd iştirakçıların qazandıqları bilik və bacarıqları gündəlik həyatlarında tətbiq etmələri, ehtiyac yarandıqda psixoloji dəstəyə müraciət etmələri və özlərini cəmiyyətin fəal üzvü kimi hiss etmələrinə davamlı dəstək göstərməkdir.
Tədbirdən foto və video görüntülər qeydə alınıb.
