Beynəlxalq Liberal Maarifçilik Mərkəzi İctimai Birliyi Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirdiyi “Qərbi Azərbaycan: tarixi-mənəvi irsin daşıyıcıları” layihəsinin yekun tədbirini keçirib.
Tədbir layihə rəhbəri Əli Hüseynlinin çıxışı ilə başladı. O, tədbir iştirakçılarına layihə haqqında məlumat verdi. Bildirdi ki, layihə çərçivəsində Qərbi Azərbaycandan olan ictimai-siyasi və elm xadimlərinin həyat və fəaliyyəti araşdırılıb.
Üç ay davam edən layihənin məqsədi Qərbi Azərbaycanın müxtəlif bölgələrindən olan və Azərbaycan mədəniyyətinin formalaşmasında mühüm rol oynamış şəxsiyyətlərin həyat və yaradıcılığını geniş ictimaiyyətə tanıtmaq, onların elmi və mənəvi irsini gələcək nəsillərə ötürməkdir. Bu istiqamətdə 20 araşdırma məqaləsi hazırlanaraq onlayn mediada dərc olunub.
Layihə, eyni zamanda, Qərbi azərbaycanlıların üzləşdiyi tarixi ədalətsizliklərin işıqlandırılması və onların problemlərinin yerli və beynəlxalq ictimaiyyətə çatdırılması baxımından da xüsusi əhəmiyyət daşıyır.
Tədbirdə Qərbi Azərbaycan İcmasının üzvləri, tanınmış alim və professorlar, araşdırmaçılar, jurnalistlər, magistr tələbələri və digər qonaqlar iştirak ediblər.
Çıxış edənlər arasında ermənişünas alim, Türkiyənin Erciyes Universitetinin professoru Qafar Çaxmaqlı Qərbi Azərbaycanın tarixindən, deportasiyalardan, xalqımızın üzləşdiyi ədalətsizliklərdən söz açdı, tədbir iştirakçılarına geniş məlumat verdi.
Əslən Qərbi Azərbaycandan olan polis polkovniki Hafiz Təmirov doğulduğu torpaqlardan çıxarılmalarından və digər hadisələrdən danışıb. Ordumuzun qüdrəti və Ali Baş Komandanın qətiyyətli addımları ilə Qarabağa qayıtdığımız kimi Qərbi Azərbaycana da dönəcəyimizə ümidinin böyük olduğunu bildirib.
UNEC-in müəllimi, siyasi fənnlər üzrə fəlsəfə doktoru Pərviz Səmədov layihəni yüksək qiymətləndirərək mövzunun davamlı işıqlandırılmasının vacibliyini vurğulayıb.
Qərbi Azərbaycan İcması Basakeçər rayonunun Nərimanlı kəndi üzrə təhsil bölməsinin rəhbəri Asəf Vəliyev Qərbi Azərbaycandan olan çoxsaylı ziyalıların olduğunu, ancaq onların hələ də yetərli qədər tanıdılmadığını bildirib. Hələ deportasiyadan öncə də təhsil sahəsində ermənilərin azərbaycanlılardan nə qədər geri qaldığını və həsəd apardığından danışan Asəf Vəliyev layihənin məqsədini və görülən işləri yüksək qiymətləndirdi.
Çıxışlardan sonra iştirakçılar arasında mövzu ilə bağlı müzakirələr davam etdirilib.
