Cənubi Koreyada xüsusi prokurorlar “üsyana rəhbərlik etməkdə” təqsirli bilinərək ömürlük həbs cəzasına məhkum edilmiş keçmiş prezident Yun Suk Yeol üçün edam cəzası tələb ediblər.
Turkustan.az xəbər verir ki, keçmiş prezidentin ömürlük həbs cəzasından verdiyi apellyasiya şikayəti üzrə keçirilən məhkəmə dinləməsində xüsusi prokuror Ço Ehun Sukun rəhbərlik etdiyi ittiham qrupu edam cəzasının tətbiqini istəyib.
Prokurorluq nümayəndəsi bildirib ki, bu işdə edam cəzasının tətbiqindən çəkinmək üçün əsas yoxdur.
“Ölüm cəzasının tətbiq edilməsində tərəddüd etmək üçün heç bir səbəb yoxdur. Ölüm cəzasına qarşı ən güclü arqument haqsız yerə məhkum edilmə ehtimalıdır. Lakin bu işdə belə bir ehtimal yoxdur”, – deyə o bildirib.
İttiham tərəfi vurğulayıb ki, Yun konstitusiyaya sadiq qalacağına and içməsinə baxmayaraq, ölkəyə qoşun yeridib və konstitusiya quruluşunu sarsıdan addımlar atıb.
“Bu, konstitusiya quruluşunu sarsıdan və ölkəni 40 il geriyə qaytarmağa çalışan bağışlanmaz bir cinayətdir”, – deyə prokurorluq nümayəndəsi qeyd edib.
Xüsusi ittiham qrupu aşağı məhkəmənin çıxardığı ömürlük həbs hökmünü həddindən artıq yüngül hesab edib. Prokurorlar ölkədə ölüm cəzasının faktiki olaraq tətbiq edilməməsinin bu cəzanın verilməsinə maneə olmamalı olduğunu bildiriblər.
Aytən Yaşar/Turkustan.az
