Rusiya Prezidenti Vladimir Putin Avropa ilə münaqişəyə hazırlaşmadıqlarını və belə bir planlarının olmadığını bildirib. O, həmçinin Ukrayna ilə danışıqların bərpası məsələsində qərarın Rusiyanın maraqları nəzərə alınmaqla veriləcəyini deyib.
Turkustan.az xəbər verir ki, Putin bu açıqlamaları 12-ci Sankt-Peterburq Beynəlxalq Birləşmiş Mədəniyyətlər Forumundan sonra keçirdiyi mətbuat konfransında səsləndirib.
“Biz Avropa ilə münaqişəyə hazırlaşmırıq. Bizim belə bir planımız yoxdur. Avropa ilə gərginliyi artırmaq üçün heç bir səbəb yoxdur”, - deyə, Putin bildirib.
Ukrayna ilə danışıqların bərpası ehtimalına toxunan Rusiya lideri bütün sülh təkliflərinin müzakirəyə açıq olduğunu, lakin qərarın Rusiyanın maraqları əsasında veriləcəyini qeyd edib. O, Ukraynanın hərəkətlərinə cavab məsələsinin də diqqətlə nəzərdən keçiriləcəyini vurğulayıb.
Putin ABŞ, Rusiya və Ukrayna arasında üçtərəfli danışıqların yenidən başlaması ehtimalından da danışıb. O, İstanbulda keçirilən danışıqların Ukrayna tərəfinin təşəbbüsü ilə dayandırıldığını bildirib.
Rusiya prezidenti həmçinin Ukraynanı 18-20 sentyabr seçkiləri zamanı Moskva və seçki məntəqələrinə, eləcə də iyun ayından etibarən Rusiyanın neft emalı zavodlarına dron hücumları həyata keçirməkdə ittiham edib.
Onun sözlərinə görə, Ukrayna Qara dənizdə də gəmilərə hücum edib və Rusiya ilə xarici bayraqlı gəmilər də daxil olmaqla, 100-dən çox gəmi zərər görüb. Bu iddialar Putinin açıqlamalarına əsaslanır.
Aytən Yaşar/ Turkustan.az
