NBC televiziyasına müsahibə verən Seyid Abbas Əraqçi, ABŞ və İsrailin ölkəsinə hücumları, həmçinin İranın İsrailə və bölgədəki ABŞ bazalarına qarşı cavab zərbələri ilə bağlı qiymətləndirmələr aparıb.
Turkustan.az xəbər verir ki, İranın bölgədəki ABŞ bazalarına hücumlarının müdafiə xarakterli bir tədbir olduğunu regional həmkarlarına çatdırdığını qeyd edən Araqçı, "Onlar bizə hücum edərkən oturub bu hücumları izləyə bilməzdik," deyib.
Əraqçi, İran lideri Ayətullah Əli Xamenei və Prezident Məsud Pezeşkiyanın sağ olub-olmaması barədə suala belə cavab verib:
"Bəli, bildiyim qədərilə sağdırlar. Məhkəmə sədri, Məclis sədri də daxil olmaqla, bütün yüksək rütbəli rəsmilər sağdır və hər kəs vəzifəsinin başındadır".
İranlı nazir bir və ya iki komandirin həyatını itirmiş ola biləcəyini, lakin bunun böyük bir problem olmadığını söyləyib.
İran ilə ABŞ arasında danışıqlar prosesi davam edərkən, İsrail və ABŞ səhər saatlarında İrana birgə hücumlar təşkil edib. İsrail Müdafiə Nazirliyi İrana qarşı preventiv hücum başlatdığını bəyan edib. ABŞ Prezidenti Donald Tramp da İrana yönəlik "böyük bir əməliyyat" başlatdıqlarını bəyan edib.
Hücumlar çərçivəsində paytaxt Tehran, İsfahan, Kərəc, Qum, Təbriz, Buşəhr, Kirmanşah və İlam şəhərləri hədəf alınıb. İsrail və İran hava məkanını bağlayarkən, İsrail daxilində fövqəladə vəziyyət elan edilib və sirenlər çalınıb.
İran ordusu ABŞ və İsrailin hücumlarına cavab olaraq, İsrailə onlarla ballistik raket və pilotsuz uçuş aparatları ilə qarşı zərbələr başlatdığını elan edib. İran raket hücumları ilə Bəhreyn, Birləşmiş Ərəb Əmirlikləri, Küveyt, Qətər və İordaniya kimi ölkələrdəki ABŞ bazalarını eyni vaxtda hədəf alıb; Bəhreyndəki ABŞ hərbi dəniz bazası və Qətərdə ABŞ-a məxsus erkən xəbərdarlıq radarı vurulub./publika.az
