Misirdə keçirilən liderlər zirvəsinə qatılan İtaliyanın baş naziri Giorgia Meloni mətbuata açıqlamasında Qəzza üçün üzərlərinə düşəni etməyə hazır olduqlarını bildirib.
Turkustan.az xəbər verir ki, dünya liderlərinin qatıldığı Şarm əl-Şeyx Sülh Zirvəsi Niyyət Bəyannaməsinin imzalanması mərasimindən sonra Meloni sammiti işıqlandırmaq üçün gələn İtaliya mətbuatının nümayəndələrinə açıqlamalar verib.
O, Qəzzada atəşkəs razılaşmasının imzalanma mərasiminə və Şarm əl-Şeyxdə keçirilən Sülh Zirvəsi çərçivəsində qəbul edilən Niyyət Bəyannaməsinə toxunaraq bildirib:
"Bu gün, sözün əsl mənasında, tarixi bir gündür. İtaliyanın bu mühüm hadisədə iştirak etməsindən son dərəcə qürur duyuram."
Meloni Qəzzada əldə olunan atəşkəs razılaşmasının ABŞ prezidenti Donald Tramp üçün böyük bir uğur olduğunu vurğulayaraq qeyd edib:
"Trampın bunun onun böyük nailiyyəti olduğunu deməyə tam haqqı var. Biz eyni sülh səylərinin Ukraynadakı müharibə də daxil olmaqla digər münaqişələrdə də nəticə verməsini ümid edirik. Bu nəticənin əldə olunmasında əməyi olan vasitəçilərə də təşəkkür borcluyuq. Yəni, Qətər Əmiri Şeyx Təmim bin Həməd Əl Taniyə, Prezident Rəcəb Tayyib Ərdoğana, Misir Prezidenti Əbdülfəttah əs-Sisi və digər ev sahiblərinə təşəkkür etməliyik".
Aytən Yaşar/ Turkustan.az
