Danimarkanın paytaxtı Kopenhagendə Avropa Siyasi Birliyinin (EST) 7-ci sammiti əsas gündəm olaraq təhlükəsizlik və müdafiə ilə başlayıb.
Turkustan.az xəbər verir ki, sammitin açılışında çıxış edən Danimarka Baş Naziri Mette Frederiksen son aylarda Ukraynada müharibənin sona çatması üçün diplomatik səylərin artdığını qeyd edərək, "Bu arada Rusiya vəhşi hücumlarını davam etdirir. İndi hamı aydın şəkildə başa düşməlidir ki, Rusiya buna məcbur edilmədikcə dayanmayacaq və bu, təkcə Ukrayna üçün deyil, bu gün bizim hamımız üçün təhlükə yaradır".
"Bizim qarşımızda mühüm vəzifə var. Biz ümumi Avropamızı o qədər güclü etməliyik ki, bizə qarşı müharibə ağlasığmaz olsun və biz bunu indi etməliyik", - Frederiksen bildirib.
Bir çox Avropa ölkəsinin Ukrayna və Avropada sülhü dəstəkləmək üçün lazım olanı etməyə hazır olduğunu bildirən Frederiksen, "Ancaq Rusiya ilə sülh yalnız güclə əldə edilə bilər. Biz Ukraynanı gücləndirməliyik və Rusiyanı daha çox sanksiyalarla zəiflətməliyik. Ukraynadakı silahlı qüvvələri maliyyələşdirməyi bacarmalıyıq. Hamımız daha çox silah, daha çox sursat çatdırmalıyıq və bunu daha tez etməliyik".
Frederiksen Avropanın müdafiə infrastrukturunun gücləndirilməsinin vacibliyinə də işarə edərək, "Mən bilirəm ki, son illərdə demək olar ki, hər kəs öz hərbi büdcəsini əhəmiyyətli dərəcədə artırıb və biz AB, ümumilikdə Avropa və NATO-da əhəmiyyətli irəliləyişlər əldə etmişik. Başqa sözlə, yoldayıq, lakin çox daha sürətli hərəkət etməliyik".
Aytən Yaşar/ Turkustan.az
