Azərbaycan-Avropa Gənclərinin Əməkdaşlığı İctimai Birliyi
Hər bir xalqın milli kimliyinin qorunması, dövlətçilik ənənələrinin yaşadılması və gələcək nəsillərə ötürülməsi gənclərin milli-mənəvi dəyərlər əsasında formalaşması ilə sıx bağlıdır. Müasir dövrdə sürətlə dəyişən informasiya mühiti, qloballaşma və rəqəmsal texnologiyaların geniş yayılması gənclərin dünyagörüşünə təsir göstərən əsas amillərdəndir. Bu şəraitdə milli-mənəvi dəyərlərin qorunması və gənc nəslə aşılanması dövlətin, ailənin, təhsil müəssisələrinin və bütövlükdə cəmiyyətin qarşısında duran mühüm vəzifələrdən biridir.
Azərbaycanda gənclərin milli ruhda, vətənpərvərlik və dövlətçilik prinsipləri əsasında yetişdirilməsi dövlət gənclər siyasətinin mühüm istiqamətlərindən hesab olunur. Bu siyasətin əsas məqsədlərindən biri öz tarixini, mədəniyyətini və milli kimliyini dərindən bilən, ölkəsinin gələcəyinə məsuliyyətlə yanaşan vətəndaşların formalaşdırılmasıdır. Milli-mənəvi dəyərlər yalnız keçmişdən miras qalan ənənələr deyil, həm də cəmiyyətin birliyini, qarşılıqlı hörməti və sosial məsuliyyəti gücləndirən mühüm amillərdir.
Bu baxımdan Bakıda Azərbaycan Respublikasının Gənclər və İdman Nazirliyi və Dini Qurumlarla İş üzrə Dövlət Komitəsinin birgə təşkilatçılığı ilə keçirilən “Gənc nəslin milli-mənəvi dəyərlər ruhunda tərbiyəsi” mövzusunda konfrans aktual əhəmiyyət daşıyır. Tədbirdə dövlət qurumlarının nümayəndələrinin, mütəxəssislərin, gənc din xadimlərinin və ictimaiyyət təmsilçilərinin iştirakı məsələyə müxtəlif istiqamətlərdən yanaşmaq və gənclərin mənəvi inkişafı ilə bağlı fikir mübadiləsi aparmaq baxımından əhəmiyyətlidir.
Konfransda çıxış edən istər Gənclər və idman naziri, istərsə də Dini Qurumlarla İş üzrə Dövlət Komitəsinin sədrinin çıxışlarında əsas fikirlərdə milli-mənəvi dəyərlərin qorunması və təbliği, eləcə də gənclərin dünyagörüşünün bu dəyərlər əsasında formalaşdırılması əsas istiqamətlər kimi diqqətə çatdırılıb. Bu yanaşma göstərir ki, gənclərin vətənpərvərlik ruhunda yetişməsi yalnız tarixi biliklərin mənimsənilməsi ilə məhdudlaşmamalı, milli-mənəvi dəyərlərin gündəlik həyatda, ictimai fəaliyyətdə və vətəndaş mövqeyində təcəssüm olunması ilə tamamlanmalıdır.
Milli-mənəvi tərbiyənin formalaşmasında ailə və təhsil müəssisələri xüsusi yer tutur. Ailə uşağın ilk sosial mühiti olaraq ona hörmət, məsuliyyət, dürüstlük və qarşılıqlı anlayış kimi keyfiyyətləri aşılayır. Təhsil müəssisələri isə bu dəyərləri tarixi biliklər, mədəni irsin öyrənilməsi və vətəndaşlıq tərbiyəsi vasitəsilə möhkəmləndirir. Dövlət və ictimai təşkilatların maarifləndirici təşəbbüsləri bu prosesi tamamlayaraq gənclərin cəmiyyət həyatında fəal və məsuliyyətli iştirakına şərait yaradır.
Müasir dövrdə milli-mənəvi dəyərlərin qorunması məsələsi rəqəmsal informasiya mühiti ilə də sıx bağlıdır. Sosial şəbəkələr və rəqəmsal platformalar gənclərin bilik əldə etməsi, ünsiyyət qurması və özünüifadəsi üçün geniş imkanlar yaradır. Bununla yanaşı, yanlış məlumatlar, manipulyativ məzmunlar və zərərli ideoloji təsirlər gənclərin düşüncəsinə mənfi təsir göstərə bilər. Buna görə də rəqəmsal savadlılığın artırılması, məlumatların etibarlılığının yoxlanılması və tənqidi düşüncə bacarıqlarının inkişaf etdirilməsi milli-mənəvi maarifləndirmənin mühüm tərkib hissəsinə çevrilməlidir.
Azərbaycan-Avropa Gənclərinin Əməkdaşlığı İctimai Birliyi olaraq hesab edirik ki, milli-mənəvi dəyərlərin qorunması keçmişə bağlılığın ifadəsi olmaqla yanaşı, gələcəyə yönəlmiş mühüm ictimai məsuliyyətdir. Gənclərin milli-mənəvi dəyərlər ruhunda formalaşması davamlı maarifləndirmə, ailə və təhsil institutlarının əməkdaşlığı, eləcə də gənclərin ictimai təşəbbüslərə cəlb olunması ilə mümkün olur. Bu istiqamətdə keçirilən konfranslar, seminarlar, müzakirələr və mədəni-maarifləndirici layihələr gənclərin öz milli kimliklərini daha dərindən dərk etməsinə və cəmiyyət qarşısında məsuliyyətlərini anlamasına töhfə verə bilər.
