OpenAI şirkəti bildirib ki, onun daxili süni intellekt modellərindən biri macar riyaziyyatçısı Paul Erdos tərəfindən hələ 1946-cı ildə irəli sürülmüş məşhur riyazi hipotezə qarşı nümunə (kontrnümunə) tapıb. Bu nəticə artıq süni intellekt tərəfindən əldə edilən ilk həqiqətən mühüm riyazi kəşflərdən biri kimi qiymətləndirilir.
Turkustan.az xəbər verir ki, söhbət “müstəvidə vahid məsafələr problemi”ndən, başqa adı ilə Erdosun 90-cı problemi adlanan məsələdən gedir. Problem sadə şəkildə belə izah olunur: müstəvidə müəyyən sayda nöqtə yerləşdirildikdə, neçə nöqtə cütünü bir-birindən dəqiq bir vahid məsafədə yerləşdirmək mümkündür?
Onilliklər ərzində riyaziyyatçılar hesab edirdilər ki, ən yaxşı həll kvadrat toruna bənzər strukturlar vasitəsilə əldə olunur. Paul Erdos özü də düşünürdü ki, hətta çox böyük sayda nöqtələr olduqda belə, bu konfiqurasiyanı əhəmiyyətli dərəcədə yaxşılaşdırmaq mümkün deyil. Lakin OpenAI-nin süni intellekti daha səmərəli quruluşların mövcud olduğunu göstərib.
Model bunu sübut etmək üçün cəbr nəzəriyyəsi metodlarından istifadə edib və klassik kvadrat torundan daha çox vahid məsafəli nöqtə cütü yaradan yerləşdirmə sxemləri hazırlayıb.
Kanadalı riyaziyyatçı Daniel Litt nəticəni öz-özünə əldə edilmiş və mahiyyət etibarilə həqiqətən maraqlı olan ilk süni intellekt riyazi nəticəsi adlandırıb. Tədqiqatçıların diqqətini xüsusilə o çəkib ki, məsələni xüsusi riyazi proqram deyil, universal dil modeli həll edib.
Məqalənin dərcindən sonra amerikalı riyaziyyatçı Vill Savin oxşar yanaşmadan istifadə edərək nəticəni daha da təkmilləşdirə bilib. Eyni zamanda, “Google DeepMind” tədqiqatçıları öz süni intellekt modelləri vasitəsilə Erdosun daha doqquz açıq problemini həll etdiklərini açıqlayıblar.
Bununla belə, alimlər vurğulayırlar ki, süni intellekt hələ də riyaziyyatda insanlara xas hesab edilən “ani ilham” və ya “daxili sezgi” qabiliyyətinə malik olmaya bilər. Ekspertlərin fikrincə, model daha çox mövcud ideyaları effektiv şəkildə birləşdirib, zaman məhdudiyyəti olmadan saysız-hesabsız variantları yoxlamağı bacarıb./Lent.az
