Çində ay təqviminə əsasən qeyd olunan Yeni İl - Bahar Bayramı qalasında ən maraqlı anlardan biri insanabənzər robotların təqdim etdiyi kunq-fu çıxışı olub.
Musavat.com xəbər verir ki, Çin dövlət televiziyası CCTV qaladan görüntüləri yayıb.
Səhnəyə bir qrup uşaqla birlikdə çıxan robotlar, Çin ənənəvi döyüş sənəti olan kunq-fu hərəkətlərini təqdim ediblər.
Robotların ustalıqla və harmonik şəkildə hərəkət etməsi, real döyüşçülərdən geri qalmaması izləyicilər tərəfindən böyük maraqla qarşılanıb.
Çin robototexnika şirkəti “Unitree” tərəfindən hazırlanmış “H2” model insanabənzər robotlar, Henan əyalətindəki Tagou döyüş sənəti məktəbinin tələbələri ilə birlikdə bacarıqlarını nümayiş etdiriblər. Robotların əsa, qılınc, nunçaku kimi aksesuarlar istifadə edərək ucalan hərəkətlər və havada çevrilmələr kimi çətin fiqurları uğurla yerinə yetirməsi xüsusilə diqqət çəkib. Qeyd edək ki, keçən il “Unitree” şirkətinin “H1” model robotları həmin qalada ənənəvi Çin xalq rəqslərini təqdim etmişdi.
Çin insanabənzər robotları süni intellektin gələcəyi formalaşdıracaq əsas texnologiyalardan biri kimi görür. 2025-ci ilin may ayında isə paytaxt Pekində robotlar və insanların yan-yana yarışdığı dünyanın ilk yarımmarafonu keçirilib.
Brauzeriniz HTML video formatını dəstəkləmir.
Videonu yüklə
