Azərbaycanda kartdan-karta köçürmələrə tətbiq edilən yeni limitlər və əməliyyat sayına qoyulan məhdudiyyətlər ictimai müzakirələrə səbəb olub. Bəzi iqtisadçılar hesab edirlər ki, bu dəyişikliklər vətəndaşların bir hissəsini yenidən nağd hesablaşmalara yönəldə bilər. Globalinfo.az-a danışan iqtisadçı Asif İbrahimov deyib ki, kartdan-karta köçürmələrə limit qoymaq problemi həll etmir, sadəcə problemi başqa ünvana daşıyır:
“İllərdir dövlət nağdsız ödənişləri artırmaq üçün vətəndaşları bank kartlarından istifadəyə təşviq edib. İnsanlar maaşını kartla alıb, kommunal ödənişlərini kartla edib, alış-verişini kartla həyata keçirib. İndi isə eyni vətəndaşa deyilir ki, kartdan-karta köçürmələrə limit var, əməliyyat sayına məhdudiyyət tətbiq edilir. Bu, məntiqi baxımdan ziddiyyətlidir”.
A.İbrahimov bildirib ki, məqsəd vergidən yayınma, kölgə iqtisadiyyatı və ya qanunsuz maliyyə dövriyyəsi ilə mübarizədirsə, bunun yolu milyonlarla adi vətəndaşın gündəlik ödənişlərini çətinləşdirmək olmamalıdır:
“Risk yaradan əməliyyatlar hədəflənməlidir, bütün cəmiyyət yox. Belə qərarlar insanların davranışını dəyişir. Vətəndaş düşünəcək ki, kartdan istifadə ona əlavə problem yaradırsa, niyə nağd puldan istifadə etməsin? Bu isə son illər nağdsız iqtisadiyyatın inkişafı üçün görülən işlərə ciddi zərbə vura bilər. Nağd dövriyyənin artması şəffaflığın azalması deməkdir. Dövlət illərlə iqtisadiyyatı rəqəmsallaşdırmağa çalışır, amma belə inzibati məhdudiyyətlər həmin prosesə etimadı zəiflədir. İnsanların bank sisteminə inamı azalanda elektron ödənişlərin inkişafından danışmaq çətin olur. Bank sektoru da bunu hiss edəcək”.
Asif İbrahimovun fikrincə, kart əməliyyatlarının azalması bankların komissiya gəlirlərinə, rəqəmsal xidmətlərin inkişafına və maliyyə inklüzivliyinə mənfi təsir göstərə bilər:
“Ən böyük itki isə vətəndaşın rahatlığının itirilməsidir. İqtisadiyyat qadağalarla deyil, etimadla inkişaf edir. İnsanlar bank sistemindən uzaqlaşmağa başlayırsa, bu, təkcə bankların yox, bütün iqtisadiyyatın problemidir. Əgər həqiqətən kölgə iqtisadiyyatı ilə mübarizə aparmaq istəyiriksə, nəzarət ağıllı, riskəsaslı və hədəfli olmalıdır. Hamıya eyni məhdudiyyəti tətbiq etmək effektiv iqtisadi siyasət deyil. Bu, sadəcə, qaydalara əməl edən vətəndaşın həyatını çətinləşdirən inzibati yanaşmadır. Maraqlıdır, biz vətəndaşı rəqəmsal iqtisadiyyata cəlb etmək istəyirik, yoxsa onu yenidən cibində nağd pulla gəzməyə məcbur edirik?”
