İranın Rəzəvi Xorasan əyalətinin Cinayət Məhkəməsinin 6-cı bölməsi tərəfindən ölüm hökmü verilən 23 yaşlı sosial media fəalı Nəcmə Əmininin həbsxanadan səs yazısı yayılıb.
Turkustan.az xəbər verir ki, bununla bağlı sosial mediada paylaşımlar edilib.
Səs yazısında deyilir:
“Mən Nəcmə Əminiyəm. 23 yaşım var. Bu mesajı 18 sentyabr 2026-cı ildə Məşəd Mərkəzi Həbsxanasından göndərirəm.
Səkkiz ay davam edən qeyri-müəyyənlikdən sonra, 16 sentyabr 2026-cı ildə hakim Asiyanın sədrliyi ilə İnqilabi Məhkəmənin Cinayət İşləri Şöbəsi tərəfindən barəmdə ölüm hökmü çıxarılıb.
Bu gün özümdən qəhrəman yaratmaq istəmirəm. Sadəcə istəyirəm ki, siz mənim səsim olasınız.
Mən günahsız bir gənc qadınam. Xəyallarım, arzularım var. Məni yenidən görəcəkləri günü səbirsizliklə gözləyən valideynlərim, hər gecəni məni əbədi itirmək qorxusu ilə keçirən ailəm var.
İstəmirəm ki, adım cinayət işinin bir neçə sətrindən ibarət olsun. Əgər səsimi eşidirsinizsə, xahiş edirəm, qulaq asıb keçməyin.
Mənim tək istəyim ədalətdir. Özümü müdafiə etmək, haqqımı qorumaq istəyirəm. Vəkillərdən, insan hüquqları müdafiəçilərindən və günahsız insanların səsinə qulaq asan hər kəsdən işimi araşdırmağı xahiş edirəm.
İstəyirəm ki, beynəlxalq təşkilatlar, insan hüquqları qurumları və Birləşmiş Millətlər Təşkilatının məsul strukturları səsimi eşitsin, işimi diqqətdə saxlasın və araşdırsınlar.
Adımı yadda saxlayın.
Bundan sonra danışmağa imkanım olub-olmayacağını bilmirəm. Amma sağ olduğum müddətcə bir ümidim var: həyatım dar ağacında sona çatmamış azad və firavan bir İran görmək”.
Qeyd edək ki, Əminin barəsində sosial mediada “dinə və peyğəmbərə hörmətsizlik” (blasphemy), “Tanrıya qarşı düşmənçilik” (moharebeh), ali rəhbəri tənqid etmək və xarici dövlətlərlə əlaqədə olmaq ittihamları irəli sürülüb./Globalinfo.az
