ABŞ Mərkəzi Komandanlığının (CENTCOM) Hörmüz boğazı ətrafında həyata keçirilən bombardman əməliyyatlarının dayandırılmasını tövsiyə etdiyi iddia olunur.
Turkustan.az xəbər verir ki, məlumata görə, komandanlıq əməliyyatların məqsədinə çatdığını və hədəflərin böyük hissəsinin məhv edildiyini hesab edir.
İddialara əsasən, CENTCOM-un komandanı admiral Bred Kuper ABŞ Prezidenti Donald Trampa Hörmüz boğazı ətrafında əlavə bombardmanlara ehtiyac qalmadığını bildirib. Qeyd olunur ki, bu qiymətləndirmə Trampın cümə günü İrana qarşı hücumların dayandırılması barədə qərarına təsir göstərib.
Axios-un mənbələrinə görə, Kuper hesab edir ki, həyata keçirilən zərbələr Tehranın ticarət gəmilərini hədəf almaq imkanlarını əhəmiyyətli dərəcədə zəiflədib və bundan sonrakı hücumlar tammiqyaslı münaqişə riskini artırmaqdan başqa strateji üstünlük qazandırmayacaq.
Məlumatda həmçinin bildirilir ki, Trampa həm hərbi, həm də mülki müşavirlər bombardmanların dayandırılmasını tövsiyə ediblər. Onların fikrincə, əlavə hava zərbələri ilə vurula biləcək mühüm hədəflər demək olar ki, qalmayıb.
Aytən Yaşar/ Turkustan.az
