ABŞ prezidenti Donald Tramp Venesuela ilə müharibə ehtimalını istisna etmədiyini bildirib.
Turkustan.az xəbər verir ki, Venesuela prezidenti Nikolas Maduroya toxunan Tramp deyib: "O, mənim nə istədiyimi dəqiq bilir. Bunu hamıdan yaxşı bilir".
ABŞ prezidenti Donald Tramp NBC News-a müsahibə verib. Onun hərəkətlərindən - o cümlədən Venesuela prezidenti Nikolas Maduroya artan təzyiqdən, Venesuelaya daxil olan və çıxan bütün neft tankerlərinin "tam blokadası" əmrindən və Venesuela yaxınlığında neft tankerinin ələ keçirilməsindən - müharibə ehtimalı barədə suala Tramp "bunu istisna etmədiyini" bildirib.
Daha çox neft tankerinin ələ keçirilə biləcəyini deyən Tramp zaman qrafiki ilə bağlı suala "Bu, vəziyyətdən asılıdır. Əgər onlar bu qədər axmaqcasına hərəkət etməyə davam etsələr, limanlarımızdan birinə qayıdacaqlar" deyə cavab verib.
Venesuela prezidenti Maduro iddia edir ki, ABŞ-ın hərəkətləri onu devirmək və dünyanın ən böyük xam neft ehtiyatlarını əhatə edən və Neft İxrac Edən Ölkələr Təşkilatının (OPEC) üzvü olan Venesuelanın neft ehtiyatları üzərində nəzarəti ələ keçirmək məqsədi daşıyır.
Aytən Yaşar/ Turkustan.az
