22 iyul 1990-cı ildə Sumqayıtda anadan olur...
1997/2005-ci illərdə orta təhsilini Bakı şəhər Nəsimi rayonunun 159 saylı tam orta məktəbində alır...
2005/2008-ci illərdə Cəmşid Naxçıvanski adına hərbi liseydə; 2008/2013-cü illərdə ali hərbi təhsili AAHM-də alır...
2010/2013-cü illərdə Almaniya Federativ Respublikasının Ali Hərbi Məktəbində "Motoatıcı" ixtisası üzrə ali hərbi təhsil alır...
Azərbaycan Silahlı Qüvbələrində zabit kimi fəaliyyətinə Murovda başlayır...
Şəhid general-mayor Polad Həşimov onun komandiri olur...
Daha sonra Xüsusi Təyinatlı Qüvvələrdə xidmət edir...
XTQ sıralarında "Kapitan" rütbəsinə qədər yüksəlir...
Vətən Müharibəsində Murovdağın, Füzulinin və Hadrutun işğaldan azad olunması uğrunda xüsusi mərdlik və şücaətlə döyüşən, Hadrut uğrunda döyüşlərdə şəhidlik mərtəbəsinə yüksələn Xüsusi Təyinatlı Qüvvələrin kapitanı Nurlan Mustafayev!
İgidimiz vətən qarşısındakı xidmətlərinə görə "Azərbaycan bayrağı" ordeni, "Vətən uğrunda" medalı, həmçinin, "Cəbrayılın azad olunmasına görə", "Füzulinin azad olunmasına görə", "Kəlbəcərin azad olunmasına görə", "Xocavəndin azad olunmasına görə" medalları ilə təltif edilib.
Qəhrəman şəhidimizin anası Rəhilə Mustafayeva deyir ki, "Nurlan elə uşaqlıqdan çox vətənpərvər idi. Həmişə deyirdi ki, zabit olacam. Çox məsuliyyətli, bacarıqlı, savadlı idi. 4 xarici dil bilirdi. Ən böyük arzusu müharibənin başlanması və bu döyüşlərdə iştirak etmək idi. Torpaqların işğal altında qalmasından çox utanırdı. Almaniyada hərbi təhsil aldığı zaman hər həftə bir əcnəbi kursant öz ölkəsinin ordusunun təqdimatını edir. Növbə Nurlana çatır. Ermənilərin də olduğu zalda o, çox böyük qürurla iki saatlıq təqdimat edir. Birdən əcnəbi millətlərdən birinin nümayəndəsi ayağa qalxıb və deyib: "Sən bayaqdan torpaqlarının 20%-ni işğalda saxlayan ordunu tərifləyirdin?" Nurlan bu sözdən pərt olsa da, həmin hərbçinin cavabını verib. Amma bu hadisəni unuda bilmirdi. İşğalla barışa bilmirdi. Müharibəyə də həvəslə qatılmışdı. Bizimlə danışanda qətiyyən ruh düşkünlüyü hiss, etmədik onda. Əksinə, ruhu çox yüksək, qələbəyə inamı böyük idi. Əsgərlərinə qarşı çox qayğıkeş idi. Həmişə evə gələndə onlara isti corab, əlcək, şirniyyat almadan dönməzdi. Müharibədə də onların qeydinə qalırmış. Bunu onun döyüş yoldaşları dedi. "
Qeyd edim ki, 7 aylıq evli olan igidimiz ata olacağını biləndə çox sevinir, lakin övladının üzünü görmək ona qismət olmur...
" Vətənə sevgi səngərdən başlayır" deyən və elə səngərdə də Vətən üçün canından keçən igidim! Səni rəhmət, sevgi, qürurla anacağıq! Tək sen deyil, biz də millət olaraq 30 illik işğalın utancını yaşadıq. Və bu utanca son qoyan sən və qəhrəman silahdaşların oldu! Nə etsək də, nə desək də nə sənin, nə də qəhrəman şəhidlərimizin haqqını ödəyə bilmərik!
Qarşında baş əyirəm, qəhrəman qardaşım! Övladına və gələcək nəsilə əmanət buraxdığın bu Vətən bir daha belə bir utanc işğalla üz-üzə qalmayacaq sayənizdə! Sən isə Vətənin, millətin daş yaddaşına bir qəhrəman kimi həkk olundun, bu adla da yaşayacaqsan! Yaşadacağıq səni! Rəhmət və sevgi ilə qal qəhrəman şəhidim!
Sevinc Bəhmənli.
