2020-ci il noyabrın 25-i Azərbaycan tarixinə Kəlbəcərin erməni işğalından azad edildiyi gün kimi həkk olunub. Prezident İlham Əliyevin 2023-cü il 31 iyul tarixli Sərəncamına əsasən, bu əlamətdar gün rəsmi şəkildə Kəlbəcər Şəhəri Günü kimi qeyd olunur.
Noyabrın 25-də Azərbaycanın ən dilbər guşələrindən olan Kəlbəcərin azad edilməsindən beş il ötüb. Kəlbəcərin işğaldan qurtuluşu Silahlı Qüvvələrin Müzəffər Ali Baş Komandanı, Prezident İlham Əliyevin qətiyyətli siyasi iradəsi, sərkərdəlik məharəti və Azərbaycan Ordusunun Vətən müharibəsində həyata keçirdiyi uğurlu hərbi əməliyyatlar nəticəsində mümkün olub.25 noyabr 2025-ci ildə Kəlbəcər şəhərində ilk dəfə Şəhər Günü təntənə ilə qeyd edildi. Şəhər Günü tədbirində dövlət rəsmiləri, şəhid ailələri, qazilər, ziyalılar, YAP Kəlbəcər rayon təşkilatının rəhbərliyi, hüquq-mühafizə orqanlarının əməkdaşları, partiya fəalları, mədəniyyət və incəsənət xadimləri, rayon ictimaiyyəti, şəhər sakinləri və şəhərin qonaqları iştirak edirdilər. Bu geniş və rəngarəng iştirakçı topluluğu tədbirə həm ehtiramın, həm də dirçələn Kəlbəcərə duyulan dərin məhəbbətin xüsusi ovqatını əlavə edirdi.Kəlbəcər Şəhəri Günü münasibətilə Kəlbəcər rayonunda Azərbaycan Respublikası Prezidentinin xüsusi nümayəndəliyinin və Mədəniyyət Nazirliyinin birgə təşkilatçılığı ilə geniş və rəngarəng bir tədbirlər proqramı həyata keçirildi. Doğma yurda qayıdan sakinlər və bu bayram ovqatını bölüşmək üçün Kəlbəcərə üz tutan qonaqlar həmin gün yenidən doğulan şəhərin ritminə qarışdılar.
Prezidentin Kəlbəcər rayonunda xüsusi nümayəndəsi Bəşir Hacıyev Kəlbəcər şəhər sakinlərini, şəhid ailələrini, Vətən müharibəsi qazilərini və doğma yurda gəlmiş bütün qonaqları Kəlbəcər Şəhəri Günü münasibətilə səmimi qəlbdən təbrik etdi.Xüsusi nümayəndə Bəşir Hacıyev çıxışında xalqımızın xilaskarı Ulu Öndər Heydər Əliyevin Kəlbəcərli soydaşlarımıza daim göstərdiyi diqqət və qayğını xatırladaraq, bu siyasətin bu gün də ardıcıllıqla davam etdirildiyini vurğuladı. Bəşir Hacıyev qeyd etdi ki, Müzəffər Ali Baş Komandan İlham Əliyevin müdrik rəhbərliyi ilə qazanılan tarixi Zəfər Azərbaycanın bütün bölgələrində olduğu kimi, Kəlbəcərdə də yeni bir dövrün qapılarını açdı. Xüsusi nümayəndə Kəlbəcərdə geniş vüsət almış quruculuq işləri, Böyük Qayıdış Proqramının uğurlu icrası barədə ətraflı məlumat verərək bildirdi ki, illər boyu susmuş ocaqlar yenidən alovlanır, boşalmış yurd yerləri yenidən nəfəs alır. Onun sözlərinə görə, bu dönüş təkcə bir qayıdış deyil — tarix qarşısında ədalətin bərpasıdır.“Bu gün Kəlbəcərdə həm çəkilən əzabların, həm dözülən ağrıların, həm də uzun illərin həsrətinin göz önündə əriyib yox olduğu gündür,” - deyən Bəşir Hacıyev, Şəhər Gününün Zəfərin bayrama çevrildiyi unudulmaz bir məqam kimi tarixə düşdüyünü vurğuladı.
O, hər bir Kəlbəcər sakinini bu yenidən doğuluşun bir parçası olmağa çağıraraq, qarşıdakı inkişaf mərhələsinin birlik, iradə və böyük ruhla daha möhtəşəm olacağına inamını ifadə etdi.
Günün ilk anlarından “Kəlbəcər – obyektivdən tarixə” adlı fotosərgi ziyarətçilərə açıldı. Eksponatlar Kəlbəcərin keçmişini, işğar illərinin izlərini və bu günün dirçəlişini kadrların dili ilə danışdırdı — dağların yaddaşı, çayların pıçıldadığı xatirələr sanki şəkillərin arasından yenidən axıb gəldi.Azərbaycan Milli Xalça Muzeyinin “Yaddaş” sərgisi isə bölgənin çoxqatlı sənət ruhunu oyadaraq hər ilmədə əsrlərin nəfəsini hiss etdirdi. Elə həmin məkanda təqdim olunan “Kəlbəcərin palitrası” rəsm sərgisi və təşkil edilən ustad dərsləri uşaqların, yaradıcı gənclərin xəyal dünyasında yeni yollar açdı. Ənənəvi sənətkarlıq nümunələrinin sərgisi isə qədim Kəlbəcərin sənət əlçimlərini bu günə daşıyan canlı bir körpü oldu. Günün ən sevilən səhnələrindən biri Gəncə Dövlət Milli Dram Teatrının çıxışı idi. Abdulla Şaiqin məşhur “Tıq-Tıq xanım” nağıl-tamaşası kəlbəcərli balacaların qəlbində işıqlı bir sevinc ocağı yandırdı və şəhər gününün üzərinə nağılabənzər yumşaqlıq çiledi.İncəsənət ustalarının iştirakı ilə möhtəşəm konsert proqramı şəhəri musiqi dalğası kimi qucaqladı. Tədbirin kulminasiyası isə Kəlbəcərin gecə səmasını al-əlvan çalarlarla işıqlandıran atəşfəşanlıq oldu. Parlaq alovlar sanki dirçəliş yolunda addımlayan Kəlbəcərin yeni səhifəsinə imza atdı.Bu silsilə tədbirlər yalnız bir bayram deyildi Kəlbəcərin yenidən doğulan ruhuna yazılmış canlı bir qeyd, mədəniyyətin bu torpaqda yenidən kök atmasının işıqlı bəyanı idi.Cənab Prezidentin Kəlbəcər Şəhəri Günü ilə bağlı imzaladığı sərəncamın bölgədə ən yüksək səviyyədə həyata keçirilməsinin canlı şahidi olduq. Tədbirin hər detalı sərgidən səhnə kompozisiyasına, musiqidən işıq təsvirlərinə qədər böyük zövq və düşünülmüş yanaşma ilə hazırlanmışdı. Kəlbəcərin bərpası və yenidən dirçəliş ruhu tədbirin bütün məqamlarında hiss olunurdu.Xüsusi olaraq tonqal mərasimi tədbirin ruhunda ayrıca bir səhifə açdı. Bu tonqal adi alov deyildi; o, həm qayıdışın, həm dirçəlişin, həm də birlik ruhunun simvolu idi.Prezidentin Kəlbəcər rayonunda xüsusi nümayəndəsi Bəşir Hacıyev və nümayəndəliyin əməkdaşları tədbirin hər bir detalını inçəliklə hazırlamışdılar. Onların zəhməti təkcə tədbirin uğurunda yox, həm də qonaqlara göstərilən diqqət və nəzakət mühiti ilə hiss olunurdu. Qonaqlar üçün yaradılan şərait, qarşılanma və müşayiət prosesi yüksək dövlət mədəniyyətinin bariz nümunəsi idi. Bu Şəhər Günü yalnız bir tədbir deyildi Kəlbəcərin yenidən doğuluşunun, Zəfərin gətirdiyi iradənin və bu torpağa qayıdış sevincinin bayramı idi. Bu gün Kəlbəcər öz dövlətinin diqqət və qayğısını ən parlaq şəkildə hiss etdi və bir daha sübut olundu ki, həyat bu dağlarda yenidən cücərir, ruhu isə daha da möhkəmlənir. Kəlbəcər Şəhəri Gününün yüksək səviyyədə keçirilməsinə verdikləri töhfəyə görə Prezidentin Kəlbəcər rayonundakı xüsusi nümayəndəsi Bəşir Hacıyev başda olmaqla bütün kollektivə təşəkkürümüzü bildiririk. Bu möhtəşəm bayram tədbiri Zəfərimizin ruhuna, Kəlbəcər və kəlbəcərlilərin adına göstərilən dəyərin parlaq təcəssümü oldu.
Həbib Misirov
YAP Kəlbəcər rayon təşkilatının sədri
