Ermənistan hökuməti Diaspora İşləri üzrə komissar Zare Sinanyan və Ədliyyə Nazirliyinin Penitensiar Xidmətinin rəisi Tsovinar Tadevosyanın mümkün istefalarını müzakirə edir.
Turkustan.az xəbər verir ki, “Hraparak” qəzetinin məlumatına görə, Diaspora İşləri üzrə komissar vəzifəsinə ən real namizəd təhsil, elm, mədəniyyət və idman nazirinin keçmiş müavini Daniel Danielyandır. Sinanyanın mümkün istefası ilə bağlı mövqeyi isə açıqlanmayıb.
Nəşr Tadevosyanın məsələsi ilə bağlı isə bildirir ki, onun dostu olduğu qeyd edilən ədliyyə naziri Srbuhi Qalyan Penitensiar Xidmət rəhbərinin vəzifəsində qalmasına çalışır.
Məlumata görə, Tadevosyanın vəzifədən azad edilməsinin təxirə salınmasını Baş nazir Nikol Paşinyandan məhz Qalyan xahiş edib.
Qəzet yazır ki, ədliyyə naziri Penitensiar Xidmət rəhbərinə daha bir şans verməyi və hökumət daxilində müzakirələr aparılmasını təklif edib. Məqsəd Tadevosyanın fəaliyyətinin effektivliyini sübut etməsinə imkan yaratmaq olub. Paşinyanın bu təklifi qəbul etdiyi bildirilir.
Qeyd edək ki, bundan əvvəl Ermənistan mediasında daxili işlər nazirinin müavini, Xilasetmə Xidmətinin rəisi Aram Qazaryanın Penitensiar Xidmətə rəhbər təyin oluna biləcəyi barədə məlumatlar yayılıb. /bakivaxti.az/
