ABŞ-da yaşayan Sasseks hersoqu Şahzadə Harri və həyat yoldaşı Meqan Marklın bu ayın sonunda Böyük Britaniyaya qayıdacağı bildirilir.
Turkustan.az xəbər verir ki, Britaniya mətbuatında yer alan xəbərlərə görə, cütlük uşaqları – Şahzadə Arçi və Şahzadə Lilibetlə birlikdə ölkəyə qayıdaraq Londondan kənarda, kral ailəsinə məxsus olmayan özəl iqamətgahda yaşayacaq. Ailənin Böyük Britaniyada uzunmüddətli qalacağı, uşaqların isə sentyabr ayında ölkədə məktəbə başlayacağı bildirilir.
Məlumata görə, Kral III Çarlz Harri və Meqanın Böyük Britaniyaya qayıtmaq planından avqustun 16-da xəbərdar edilib. Kralın ailəni daha tez-tez görmək imkanını müsbət qarşıladığı qeyd olunur.
Britaniya taxt-tacının varisi Şahzadə Uilyam və həyat yoldaşı Ketrin də cütlüyün geri qayıtmaq planlarından məlumatlandırılıb.
Harri və Meqan ötən ay uşaqları ilə birlikdə Böyük Britaniyada Kral III Çarlzı ziyarət etmişdilər. Lakin onların ölkəyə qayıtmaq və burada yaşamaq planının həmin görüş zamanı müzakirə olunmadığı bildirilir.
Cütlüyün Böyük Britaniyaya qayıtması onların 2020-ci ildə kral ailəsinin əsas üzvləri kimi vəzifələrindən geri çəkilərək ABŞ-a köçməsindən sonra ailə həyatlarında ən mühüm dəyişikliklərdən biri kimi qiymətləndirilir. Bununla belə, onların kral ailəsinin işləyən üzvləri kimi rəsmi vəzifələrə qayıtmayacağı bildirilir.
Aytən Yaşar/ Turkustan.az
