ABŞ-ın vitse-prezidenti JD Vensə yaxın şəxslərin İsrailin Baş naziri Benyamin Netanyahunun ABŞ Prezidenti Donald Trampla görüşməsinin qarşısını almağa çalışdığı iddia olunub.
Turkustan.az xəbər verir ki, bu barədə "Yedioth Ahronoth" qəzeti İsrailin yüksək vəzifəli rəsmilərinə istinadən məlumat yayıb.
Məlumata görə, JD Vensin komandası Netanyahunun Trampa İranla bağlı daha sərt mövqe tutması üçün təzyiq göstərə biləcəyindən narahat olub və bu səbəbdən iki lider arasında görüşün baş tutmaması üçün səylər göstərib.
Qəzetə danışan yüksək rütbəli İsrail rəsmiləri həmçinin iddia ediblər ki, Tramp və Netanyahu arasında münasibətlər ictimaiyyətə təqdim olunduğundan daha yaxşıdır və iki lider arasında müşahidə olunan gərginliyin bir hissəsi "səhnələşdirilmiş qarşıdurma" xarakteri daşıyır.
Rəsmilər bildiriblər ki, Ağ Evdə JD Vensə yaxın şəxslər ikitərəfli görüşə qarşı çıxaraq, bunu "Trampı İrana qarşı daha sərt mövqe tutmağa sövq etmək cəhdi" kimi qiymətləndiriblər.
Xəbərdə həmçinin qeyd olunub ki, ABŞ Prezidentinin xüsusi nümayəndəsi Stiv Vitkoffun müşaviri Arye Laytstounun mümkün görüşün tarixini müəyyənləşdirmək üçün Netanyahu ilə görüşməsi planlaşdırılırdı.
Bundan başqa, məlumatda bildirilir ki, Netanyahu 27 iyulda Respublikaçı senator Lindsi Qrahamın dəfn mərasimində iştirak etmək üçün ABŞ-a səfər etməyi nəzərdən keçirsə də, Tramp ilə görüşə təminat verilmədiyi üçün Vaşinqtona getməkdən çəkinib.
Qeyd edək ki, sözügedən məlumatlar "Yedioth Ahronoth" qəzetinin İsrail rəsmilərinə istinadən yaydığı iddialardır və rəsmi Vaşinqton və ya Təl-Əviv tərəfindən təsdiqlənməyib.
Aytən Yaşar/ Turkustan.az
