87 illik ənənə: Ruzveltdən Obamaya
ABŞ hər bir prezident vəzifəsindən ayrıldıqdan sonra öz siyasi irsini əbədiləşdirmək üçün rəsmi “Prezident Kitabxanası və Muzeyi” (Presidential Library and Museum) inşa etdirir. Lakin 45-ci prezident Donald Trampın son bəyanatları bu köklü ənənənin sarsıla biləcəyindən xəbər verir. Turkustan.Az xəbər verir ki, AzPost ABŞ prezidentlərinin “post-prezidentlik” dövründəki fəaliyyətlərini və Trampın qalmaqallı seçimini araşdırıb.
Prezident kitabxanaları sistemi 1939-cu ildə Franklin D. Ruzvelt tərəfindən təməli qoyulmuş bir rəsmiyyətdir. Bu mərkəzlər sadəcə kitab anbarı deyil, həm də dövlət arxivlərinin qorunduğu, tədqiqatların aparıldığı və tarixi eksponatların nümayiş olunduğu nəhəng komplekslərdir.
Barak Obama: Çikaqoda inşası davam edən “Obama Prezident Mərkəzi” 500 milyon dollardan çox büdcəyə malikdir.
Corc Buş (oğul): Dallasda (Texas) yerləşən kitabxanası onun 11 sentyabr hadisələri və İraq müharibəsi dövründəki fəaliyyətini əks etdirən interaktiv muzeylə zəngindir.
Bill Klinton: Arkanzasda yerləşən kompleksi həm də beynəlxalq humanitar layihələrin idarə edildiyi qərargah funksiyasını daşıyır.
Donald Tramp: “Kitabxanalar darıxdırıcıdır”
Ənənəyə sadiq qalaraq hər kəs Florida və ya Nyu-Yorkda “Donald J. Trump Library” gözlədiyi bir vaxtda, eks-prezident fərqli mövqe nümayiş etdirib. Tramp prezident kitabxanaları və muzeylərini “darıxdırıcı” adlandıraraq, bu konsepsiyaya maraq göstərmədiyini bildirib.
Onun planına əsasən, öz irsini “klassik bir arxiv” yerinə, daha funksional və gəlirli bir layihə ilə — Mayamidə möhtəşəm bir otel və kurort mərkəzi ilə əvəzləmək niyyətindədir. Tramp hesab edir ki, insanlar tozlu sənədlərə baxmaqdansa, onun adını daşıyan dəbdəbəli bir məkanda vaxt keçirməyə daha çox üstünlük verərlər.
