“Tramp inanılmaz dərəcədə sağlamdır, vəzifəni üzərimə götürməyə hazıram”.
Turkustan.az xəbər verir ki, ABŞ-ın vitse-prezidenti Ceyms Devid Vens (J.D. Vance), prezident Donald Trampın səhhəti ilə bağlı yayılan narahatlıqlara cavab verib. USA Today-ə danışan Vens, sosial şəbəkələrdə Trampın əl və ayaqlarındakı göyərmələr və şişkinliklə bağlı yayılan görüntülərin müzakirələrə səbəb olduğunu bildirib.
Vens Trampın səhhəti ilə bağlı narahatlıqların "venöz çatışmazlıq" — yəni dərialtı toxumanın qalınlaşması və qan dövranında ləngimə ilə xarakterizə olunan damar problemi — diaqnozu ilə əlaqədar olduğunu təsdiqləyib. Lakin buna baxmayaraq, Trampın “inanılmaz dərəcədə sağlam və enerjili” olduğunu vurğulayıb:
Tramp komandadakı ən gənc insan olmasa da, ən uzun işləyən şəxsdir. Gec saatlara qədər zəng edən, səhərlər isə ilk oyanan odur.”
Prezidentlik səlahiyyətlərini öz üzərinə götürməyə hazır olub-olmaması ilə bağlı suala isə Vens belə cavab verib:
“Allah eləməsin, dəhşətli bir faciə baş versəydi, son 200 gündə Trampın yanında keçirdiyim müddət qədər yaxşı bir iş təcrübəsi təsəvvür edə bilmərəm.”
Trampın səhhəti ilə bağlı rəsmi açıqlamanı isə Ağ Evin mətbuat katibi Karolin Leavitt verib. O, iyulun 18-də Trampa "venöz çatışmazlıq" diaqnozu qoyulduğunu və vəziyyətin nəzarətdə olduğunu bildirib. Leavitt həmçinin Trampın əllərindəki qançırları "aspirin istifadəsi fonunda tez-tez əl sıxması nəticəsində yaranmış toxuma zədələnməsi" kimi izah edib və əlavə edib ki, prezidentin ümumi sağlamlıq durumu "yaxşı" qiymətləndirilir.
Aytən Yaşar/ Turkustan.az
