NATO və ya Aİ ölkələrindən Ukraynaya hərbçilərin göndərilməsi imkanları nəzərdən keçirilmir.
Turkustan.az xəbər verir ki, bu barədə Almaniya kansleri Fridrix Merz İtaliyanın baş naziri Giorgia Meloni ilə görüşdən sonra bildirib.
"Heç bir qərar yoxdur, NATO və Aİ qoşunlarının Ukraynaya göndərilməsi müzakirə edilmir. Bu, tamamilə siyasi kontekstdən kənardır və bu barədə danışmaq üçün heç bir əsas yoxdur. Hazırda atəşkəs üzərində işləyirik".
Öz növbəsində Meloni xatırladıb ki, o, Fransa prezidenti Emmanuel Makron tərəfindən irəli sürülən və “istəklilərin koalisiyasını” toplayan Böyük Britaniyanın baş naziri Keir Starmer tərəfindən dəstəklənən oxşar ideyaya həmişə şübhə ilə yanaşır. Merz, Polşa hökumətinin başçısı Donald Tusk və Vladimir Zelenskinin iştirakı ilə artıq bu formatda iki görüş baş tutub. Onlar zamanı ABŞ prezidenti Donald Trampla telefon danışıqları aparıldığı bildirilir. Meloni bu işdə iştirak etməyib, öz mövqeyini Romanın “hazır olmadığı və heç bir qoşun göndərməyəcəyi” ilə izah edib.
Bundan əvvəl ABŞ prezidentinin Ukrayna üzrə xüsusi nümayəndəsi Keyt Kelloq bəyan etmişdi ki, Vaşinqton Ukrayna münaqişəsinin nizamlanması planını müzakirə edir, ona əsasən, çəkindirici qüvvələr Dneprdən qərbdə yerləşdiriləcək. Onun sözlərinə görə, onların tərkibinə dörd Avropa ölkəsinin kontingenti daxil olacaq: Böyük Britaniya, Polşa, Fransa və Almaniya.
Aytən Yaşar/ Turkustan.az
