Avqustun 12-də tam Günəş tutulması baş verəcək. Tam Günəş tutulması insanlar üçün valehedici səma hadisəsi olsa da, heyvanlar üçün olduqca təəccüblü təcrübəyə çevrilə bilər. Günorta saatlarında işığın qəfil azalması və temperaturun aşağı düşməsi bəzi heyvanların gündəlik ritmini pozarkən, digərlərində stress və istiqamətlənmə dəyişikliklərinə səbəb ola bilər.
Turkustan.az "CNN Türk"ə istinadən xəbər verir ki, heyvanlar gündəlik həyatlarını davam etdirərkən işıq, temperatur və ətrafdakı səslər kimi təbii siqnallardan istifadə edirlər. Günəş tutulması zamanı bu şərtlərin qısa müddətdə dəyişməsi bəzi növlərin gecənin başladığını düşünməsinə səbəb ola bilər. Hər heyvan eyni reaksiya verməsə də, elmi müşahidələr bir çox növdə diqqətçəkən davranış dəyişikliklərinin baş verdiyini göstərir.
Quşlar bir anda susa bilər
Tutulma zamanı ən diqqətçəkən dəyişikliklərdən biri quşlarda müşahidə olunur. Gün ərzində oxuyan bəzi quşlar ətraf qaranlıqlaşdıqda səslərini kəsərək axşam davranışına keçə bilirlər. Gecə aktiv olan bayquşlar kimi növlər isə əksinə, hərəkətlənməyə başlaya bilər.
Günəş yenidən göründükdə quşların yenidən oxumağa başladığı, bəzi müşahidələrdə isə səhər saatlarına nisbətən daha intensiv səslər çıxardıqları bildirilir.
Fillər sığınacaqlarına yönəlir
Qəfil qaranlığı gecənin başlanğıcı kimi qəbul edənlər yalnız quşlar deyil. Zooparklarda aparılan müşahidələr zamanı bəzi fillərin tutulma vaxtı gecələdikləri ərazilərə doğru hərəkət etdiyi görülüb.
Bu davranış heyvanların ətrafdakı işıq dəyişikliklərindən gündəlik rutinlərini müəyyən edən siqnal kimi istifadə etdiyini göstərir.
Zürafə və qorillərdə stress davranışları müşahidə oluna bilər
Bəzi heyvanlar isə tutulmaya daha narahat reaksiya verə bilər. Zürafələrin irəli-geri hərəkət etdiyi, bəzi qorillərin isə olduqları ərazilərdə normaldan daha aktiv və ya gərgin davrana bildikləri müşahidə olunur.
Arılar və digər həşərat növlərində də aktivliyin azalması və ya yuvalara qayıtmaq meyli müşahidə edilə bilər.
İt və pişiklər də narahat olur
Ev heyvanlarının reaksiyaları insandan insana dəyişdiyi kimi, heyvandan heyvana da fərqlənir. Bəzi it və pişiklər tutulma zamanı gəzişməyə, sızıldamağa və ya gizlənməyə başlaya bilər.
Xüsusilə ətraf mühitdəki dəyişikliklərə həssas heyvanlarda müvəqqəti narahatlıq daha qabarıq şəkildə müşahidə oluna bilər. Lakin bütün ev heyvanlarının tutulmaya nəzərəçarpacaq reaksiya verməsi gözlənilmir.
Qaranlıq bitdikdən sonra rutinlərinə qayıdırlar
Tam tutulmanın yaratdığı sıx qaranlıq adətən cəmi bir neçə dəqiqə davam edir. Günəş işığının yenidən güclənməsi ilə heyvanların davranışları da qısa müddətdə normallaşmağa başlayır.
Quşlar yenidən oxuyur, gecə davranışına keçən heyvanlar isə yenidən gündüz rutinlərinə qayıdır. Alimlərin müşahidələri Günəş tutulmasının heyvanlarda qalıcı dəyişiklikdən daha çox, qısamüddətli “gündüz-gecə qarışıqlığı” yaratdığını göstərir. /Qaynarinfo/
