Amerika Ürək Assosiasiyasının (AHA) yeni elmi hesabatına görə, gündə beş fincana qədər qəhvə istehlakı əksər sağlam yetkinlər üçün təhlükəsiz hesab olunur.
Turkustan.az xəbər verir ki, mütəxəssislərin fikrincə, müntəzəm qəhvə istehlakı 2-ci tip diabet, insult və ürək çatışmazlığı riskinin azalması ilə əlaqələndirilə bilər.
“ABC News”un məlumatına görə, kardioloq doktor Cennifer Miao bildirib ki, qəhvə 2-ci tip diabet, insult və ürək çatışmazlığı riskinin azalmasına kömək edə bilər. Bununla belə, qəhvənin qan təzyiqinə təsiri daha mürəkkəbdir və mövcud araşdırmalar bu məsələdə tam uyğun nəticələr ortaya qoymur.
AHA-nın elmi paneli əvvəlki tövsiyələrdən fərqli olaraq, daha yeni və keyfiyyətli tədqiqatların nəticələrini də nəzərdən keçirib. Son klinik sınaqlara əsasən, gündəlik qəhvə istehlakı ürək ritminin pozulmasının, hətta bu vəziyyətlə bağlı müalicə alan xəstələrdə belə, təkrarlanma riskini 39 faizə qədər azalda bilər.
Araşdırmalara görə, müntəzəm qəhvə istehlakı 2-ci tip diabetə tutulma riskinin 20–30 faiz azalması ilə də əlaqələndirilir.
Aytən Yaşar/ Turkustan.az
