ABŞ Prezidenti Donald Tramp qlobal neft tədarükünün sabitləşməsi fonunda Vaşinqtonun Rusiyanın enerji sektoruna qarşı sanksiyaların yenidən tətbiq olunmasını nəzərdən keçirdiyini bildirib.
Turkustan.az xəbər verir ki, Tramp bu barədə G7 Summit çərçivəsində Mohamed bin Zayed Al Nahyan ilə görüş zamanı jurnalistlərin suallarını cavablandırarkən danışıb.
Rusiyaya qarşı sanksiyaların sərtləşdirilməsi və ya uzadılması ehtimalı ilə bağlı suala cavab verən ABŞ lideri bildirib ki, Vaşinqton yaxın vaxtlarda Rusiya neftinə qarşı məhdudiyyətləri yenidən tətbiq edə bilər.
“Biz bunu yaxın gələcəkdə edə biləcəyik, çünki neft tədarükü artıq bərpa olunub”, – deyə Tramp qeyd edib.
ABŞ Prezidenti əlavə edib ki, Rusiya neftinin ixracına dair tətbiq olunan istisnalar müvəqqəti xarakter daşıyır.
Trampın sözlərinə görə, sanksiyaların müəyyən müddətə yumşaldılmasının məqsədi qlobal neft bazarında tədarük zəncirinin pozulmasının qarşısını almaq olub.
“Biz sanksiyaları dayandırdıq, çünki neft tədarükünün pozulmasını istəmirdik. Lakin müəyyən mərhələdə bu məhdudiyyətləri yenidən tətbiq edə bilərik”, – deyə ABŞ Prezidenti vurğulayıb.
Aytən Yaşar/ Turkustan.az
