Çili sahillərində baş verən qeyri-adi hadisə dünya mediasının gündəminə çevrilib. Avarlı idman qayığında (kayakda) dənizə çıxan gənc bir neçə saniyə ərzində nəhəng qozbel balinanın ağzına düşüb, lakin möcüzə nəticəsində sağ qalıb.
Turkustan.az xarici mediaya istinadən xəbər verir ki, hadisə Çilinin cənubundakı Patagoniya bölgəsində, Maqellan boğazı yaxınlığında baş verib.
24 yaşlı Adrian Simankas dənizdə idman qayığında hərəkət edərkən qəfildən suyun altından qalxan nəhəng qozbel balina onu və qayığını ağzına alıb. Həmin anlar gəncin yaxınlıqda olan atası tərəfindən lentə alınıb.
Videoda əvvəlcə Adrianın sakit dənizdə kayak sürdüyü görünür. Bir neçə saniyə sonra isə suyun altından qalxan balina onu tamamilə görünməz edir. Hadisəni izləyənlər üçün hər şeyin bitdiyi təsiri yaransa da, bir neçə saniyə sonra gənc yenidən suyun üzərində görünür.
Adrián Simankas sonradan verdiyi açıqlamada yaşadıqlarını belə təsvir edib:
“Birdən hər tərəf qaraldı. Əvvəlcə böyük bir dalğanın məni vurduğunu düşündüm. Sonra anladım ki, balinanın ağzındayam. Həmin an həqiqətən öldüyümü düşündüm.”
Gəncin sözlərinə görə, onu ən çox qorxudan məqam balina deyil, soyuq sularda itib-batmaq ehtimalı olub. Lakin hadisədən saniyələr sonra o, yenidən suyun səthinə çıxmağı bacarıb.
Dəniz biologiyası üzrə mütəxəssislər bildirirlər ki, qozbel balinalar insanlarla qidalanmır. Bu növün boğazı insanı uda biləcək qədər geniş deyil. Alimlərin fikrincə, balina balıq sürüsünü ovlayarkən kayakçını təsadüfən ağzına alıb və dərhal geri buraxıb.
Ekspertlər belə hadisələrin son dərəcə nadir olduğunu vurğulayırlar. Məhz buna görə də görüntülər qısa müddətdə milyonlarla insan tərəfindən izlənilib və BBC, CNN daxil olmaqla dünyanın aparıcı media qurumlarında yayımlanıb.
Sosial şəbəkələrdə istifadəçilər hadisəni “ikinci həyat şansı”, “möcüzəvi xilas” və “müasir dövrün ən inanılmaz dəniz hadisələrindən biri” adlandırıblar.
Hadisənin videosu hazırda internetdə ən çox izlənilən görüntülərdən biri hesab olunur.
Onu təqdim edirik:
/Musavat.com
