Rusiyanın üç günlük nüvə təlimləri ilə Qərbə strateji mesaj verdiyi, Ukraynanın isə dərin zərbəli pilotsuz uçuş aparatları ilə Rusiyanın neft infrastrukturunu və müharibə iqtisadiyyatını hədəfə aldığı yeni mərhələdə geosiyasi gərginlik daha da kəskinləşir.
Turkustan.az xəbər verir ki, Moskvadan Kiyevə, Avropa paytaxtlarından Pekinə qədər uzanan bu xətt getdikcə daha kövrək və riskli bir balans yaradır.
Nüvə çəkindirmə ritorikası, enerji müharibəsi, iqtisadi təzyiqlər və psixoloji üstünlük uğrunda mübarizə artıq bir-biri ilə sıx bağlı elementlərə çevrilib. Bu vəziyyətdə Avropanın əsas narahatlığı kiçik bir səhv hesablamanın daha genişmiqyaslı qlobal böhrana səbəb ola bilməsidir.
Rusiya-Ukrayna müharibəsi artıq təkcə Donbas cəbhəsində aparılan klassik döyüşlərdən ibarət deyil; o, getdikcə iqtisadi infrastrukturun, strateji çəkindirmənin və informasiya-psixoloji mübarizənin toqquşduğu çoxqatlı bir qarşıdurmaya çevrilir.
Rusiya Müdafiə Nazirliyinin məlumatına görə, 19–21 may tarixlərində keçirilən genişmiqyaslı nüvə təlimlərində 64 mindən çox hərbçi, təxminən 7800 hərbi texnika, strateji raket sistemləri, qanadlı raketlər və hava qüvvələri iştirak edib.
Ssenariyə Belarusdakı taktiki nüvə imkanlarının da daxil edilməsi bu təlimlərin sadəcə rutin hərbi məşq deyil, Qərbə yönəlmiş strateji mesaj xarakteri daşıdığını göstərir. Moskvanın hərbi dairələri bunu NATO-nun artan təzyiqlərinə qarşı “cavab xarakterli hazırlıq”, bəzi analitiklər isə “çəkindirmə nümayişi” kimi qiymətləndirirlər.
Aytən Yaşar/ Turkustan.az
