ABŞ və İsrailin İrana qarşı hərbi strategiyası “5 dairə” modeli üzərində qurulub. Bu modelin məqsədi ölkəni sistemli şəkildə iflic etməkdir.
Turkustan.az xəbər verir ki, bu barədə “Əl-Cəzirə”nin təhlilində bildirlib.
Hərbi və strateji ekspert, briqada generalı Elias Hanna “Əl-Cəzirə”yə bildirib ki, ABŞ və İsrail İrana qarşı müharibəni beş istiqamətə yönəldir: liderlər, həyati əhəmiyyətli sistemlər, infrastruktur, əhali və silahlı qüvvələr.
Hərbi təhlilində Hanna əlavə edib ki, Amerika və İsrail hücumları ilkin olaraq yüksək vəzifəli liderləri, xüsusən də Ali Rəhbər Əli Xameneini hədəf alıb. Əməliyyat İran Milli Təhlükəsizlik Şurasının katibi Əli Laricaninin öldürülməsi ilə davam edib. Xamenei öldürüləndən sonra Laricaninin rolu hərbi və siyasi sahələr arasındakı boşluğu aradan qaldırmaq və İranın milli təhlükəsizliyi üçün uyğun hesab edilən tədbirləri təklif etmək idi.
İkinci istiqamət müharibə səylərini dəstəkləyən həyati əhəmiyyətli sistemlərin hədəfə alınmasını əhatə edir. Buna görə də İsrail ordusu ötən gün İranın körfəz sahilindəki strateji neft-qaz zavodunu bombalayıb.
Briqada generalı Elias Hanna enerji sektorunun həyati əhəmiyyətli sistemlərə aid olduğunu və buna görə də strateji Asaluyeh zavodunun hədəfə alındığını xatırladıb. Bu zavod İran qazının 80%-ni daxili istifadə üçün istehsal edir və bütün hərbi sənaye və təchizat zəncirləri bu zavoda əsaslanır.
Üçüncü istiqamətdə sənaye, sursat qurğuları, təchizat zəncirləri, körpülər və yollar da daxil olmaqla infrastruktur hədəfə alınır.
Dördüncü dairə əhaliyə aiddir. Burada birbaşa hərbi hücum yox, psixoloji və informasiya təsiri əsas rol oynayır. Yəni insanların şüuru və qavrayışları müasir müharibə qorxusu ilə manipulyasiya olunur.
Beşinci dairə İran silahlı qüvvələrinin hədəf alınmasıdır, İnqilab Keşikçiləri Korpusu (SEPAH), “Bəsic” qüvvələri və digər hərbi strukturlar.
Hərbi ekspert deyir ki, beş hədəfə mütləq ayrı-ayrılıqda deyil, eyni vaxtda zərbə endirilməlidir.
Bombardman İranın cənub-qərb bölgəsində və paytaxt Tehran ətrafında, eləcə İsfahan və Şirazda paylanır.
Bombardmandan sonra nəticələr qiymətləndirilir və sonra yeni bir mərhələ başlayır.
Hərbi ekspertin fikrincə, ABŞ və İsrail "beş dairə" adlandırılan hədəfləri vurmaqla İranı iflic etməyə və xaos yaratmağa çalışır. Bu, ABŞ prezidenti Donald Trampın İran xalqının məsələləri öz əlinə almalı olduğu barədə əvvəlki açıqlaması ilə uyğun gəlir.
Strategiya yalnız hərbi deyil, həm də siyasi və psixoloji müharibə elementlərini birləşdirir.
İsrail və ABŞ İrana qarşı müharibəni 19-cu gündür davam etdirir və İran liderlərinin hədəfə alınması güclənib. Tehran sonuncu dəfə dünən - çərşənbə günü kəşfiyyat naziri Esmail Xətibin ölümünü elan edib.
İran İnqilab Keşikçiləri Korpusu (SEPAH) da dünən İsrailin Tehrana hava hücumunda öldürülən “Bəsic” milisinin komandiri briqada generalı Qulamrza Süleymaninin ölümünə yas tutub./modern.az
