Böyük Britaniya Xarici İşlər Nazirliyi Yaxın Şərqdə artan regional gərginlik səbəbindən Türkiyə də daxil olmaqla 16 ölkəyə səyahət xəbərdarlığı verib.
Turkustan.az xəbər verir ki, nazirlik Britaniya vətəndaşlarını səyahət planlarını nəzərdən keçirməyə və olduqları ölkələrdə “əlavə tədbirlər” görməyə çağırıb.
Xəbərdarlıqda bölgədəki gərginliyin nəqliyyatda fasilələrə və gözlənilməz nəticələrə səbəb ola biləcəyi vurğulanıb. Hər il yüz minlərlə britaniyalı turistin ziyarət etdiyi Türkiyə ilə yanaşı, Birləşmiş Ərəb Əmirlikləri, Kipr və Misir də xəbərdarlığa daxildir.
Səyahət tövsiyəsi verilən ölkələr: Türkiyə, BƏƏ, Yəmən, Suriya, Səudiyyə Ərəbistanı, Qətər, Oman, Liviya, Livan, Küveyt, İordaniya, İraq, Misir, Kipr, Bəhreyn və İran.
Xəbərdarlıq İranın cümə axşamı günü hava məkanını kommersiya uçuşları üçün bağlamasından sonra verilib. Bu qərarın İran daxilində etirazların sərt şəkildə yatırılmasından və Tehran ilə Vaşinqton arasında gərginliyin artmasından sonra verildiyi bildirilir.
Nazirliyin açıqlamasında deyilir: “Regionda gərginlik riski artıb. Potensial eskalasiya səyahətlərdə fasilələrə və gözlənilməz nəticələrə səbəb ola bilər. Britaniya vətəndaşlarına fərdi şəraitlərini nəzərə alaraq ağlabatan tədbirlər görmələri tövsiyə olunur”.
SafeAirspace təşkilatı xəbərdarlıq edib ki, İran hava məkanının bağlanması gələcəkdə yeni təhlükəsizlik və hərbi fəaliyyətlərin əlaməti ola bilər. ABŞ Prezidenti Donald Trampın İran rejiminə qarşı potensial hərbi əməliyyatı bölgədə daha geniş eskalasiyaya və beynəlxalq səyahətlərdə pozuntulara səbəb ola bilər.
Aytən Yaşar/ Turkustan.az
