Belarus prezidenti Aleksandr Lukaşenko bildirib ki, Ukrayna-Rusiya müharibəsində hava atəşkəsi ilə bağlı qərar Rusiya prezidenti Vladimir Putin, ABŞ prezidenti Donald Tramp və Ukrayna prezidenti Vladimir Zelenski arasında keçiriləcək üçtərəfli sammit vasitəsilə əldə edilə bilər.
Turkustan.az xəbər verir ki, “Belta” xəbər agentliyinin məlumatına görə, Lukaşenko “Time” jurnalına müsahibəsində Belarus-ABŞ münasibətlərindən tutmuş Rusiya-Ukrayna müharibəsinə qədər aktual mövzularda açıqlamalar verib.
Lukaşenko Ukraynadakı müharibədən sonra Minsk-Vaşinqton münasibətlərinin pisləşdiyini, lakin iki ölkə arasında rabitə kanallarının onların kəşfiyyat xidmətləri vasitəsilə davam etdiyini qeyd edib.
Bu arada Lukaşenko ABŞ-Belarus münasibətləri ilə bağlı prosesi şəxsən davam etdirdiyinə diqqət çəkib və ABŞ dövlət katibinin müavini Kristofer Smitin ABŞ-ın Belarusa son səfərlərində əsas rol oynadığını bildirib.
"O, həmişə zarafatla gələndə MKİ agenti adlandırdığım yaxşı insandır. Onunla beş dəfə görüşdük", - Lukaşenko deyib.
Belarusla təmasda ABŞ tərəfinin təşəbbüskar olduğuna diqqət çəkən Lukaşenko, ABŞ prezidenti Donald Trampın xüsusi nümayəndəsi Keyt Kelloq və komandasının iyun ayında Minskə səfərinin 5-ci Amerika nümayəndə heyəti olduğunu bildirib.
Lukaşenko amerikalıların münasibətləri yaxşı olduğu üçün ondan bəzi məsələləri Rusiya prezidenti Vladimir Putinə çatdırmasını istədiklərini ifadə edərək, bunlardan birinin Rusiya ilə Ukrayna arasında havadan atəşkəs olduğunu, lakin Ukraynanın Rusiyanı bombalamağa davam etdiyi üçün bunun qəbul edilmədiyini açıqlayıb.
Lukaşenko Rusiya və Belarusun təkcə tarixi deyil, həm də müttəfiqlik əlaqələrinin olduğunu vurğulayaraq, onların “Oreşnik” ballistik raketi və nüvə silahının əldə edilməsi kimi çox yaxşı hərbi əlaqələrinin də olduğunu qeyd edib.
Ukraynanın eyni addımı atacağı təqdirdə Rusiya prezidenti Putinin havada atəşkəsə razılaşa biləcəyini deyən Lukaşenko Putin, ABŞ prezidenti Donald Tramp və Ukrayna prezidenti Vladimir Zelenski arasında üçtərəfli görüşü təklif edib.
Aytən Yaşar/ Turkustan.az
