ABŞ-ın nüvə obyektlərinə hücumuna cavab olaraq İran güclü hərbi cavab verib.
Turkustan.az xəbər verir ki, İran İslam İnqilabı Keşikçiləri Korpusu (SEPAH) bu gecə Qətərdə yerləşən və ABŞ-ın Qərbi Asiyada ən böyük hərbi bazası sayılan Əl-Udeyd aviabazasına raket zərbələri endirdiyini bəyan edib.
SEPAH-ın yaydığı rəsmi məlumatda bildirilir ki, bu zərbələr "Bəşarət əl-Fəth" (Qələbə müjdəsi) adlı cavab əməliyyatı çərçivəsində həyata keçirilib və İranın Ali Milli Təhlükəsizlik Şurası tərəfindən təsdiqlənib. Əməliyyata İranın ən yüksək hərbi orqanı olan “Xatəm əl-Ənbiyə” Mərkəzi Komandanlığı rəhbərlik edib.
Bəyanatda yer alan ən diqqətçəkən mesaj isə belədir:
"Zərbə vurub qaçmaq dövrü artıq bitib. Təkrar hücumlar ABŞ-ın Qərbi Asiyadakı mövcudluğunun sonunu sürətləndirəcək".
SEPAH həmçinin xəbərdarlıq edib ki, əgər hücumlar davam edərsə, bu, yalnız ABŞ-ın regiondakı hərbi infrastrukturunun deyil, həm də "sionist rejimin" tamamilə çöküşünə səbəb olacaq.
Hazırda regionda gərginlik pik həddə çatıb və qarşılıqlı hücumların yeni mərhələyə keçəcəyi istisna olunmur. musavat.com/
