Perm Dövlət Politexnik Universitetinin (Perm Milli Tədqiqat Politexnik Universiteti) alimləri bildiriblər ki, manqalda bişirilən ət zamanı yaranan kanserogen maddələrin təsirini azaltmaq üçün kabab mütləq göyərti ilə birlikdə istehlak edilməlidir.
Turkustan.az bu barədə xarici mediaya istinadla xəbər verir.
Mütəxəssislərin sözlərinə görə, xüsusilə cəfəri və reyhan kimi antioksidantlarla zəngin göyərtilər orqanizmdə zərərli birləşmələrin təsirini zəiflədə bilər. Bundan əlavə, eyni anda çox miqdarda ət yeməkdən çəkinmək və daha az yağlı ətlərə, məsələn hinduşka və dovşan ətinə üstünlük vermək tövsiyə olunur.
Alimlər qeyd edirlər ki, açıq odda ət bişirildikdə polisiklik aromatik karbohidrogenlər, heterosiklik aminlər və nitrozaminlər kimi kanserogen maddələr əmələ gəlir. Bu birləşmələr DNT-ni zədələyərək uzunmüddətli dövrdə xərçəng riskini artıra bilər.
Tədqiqatçılar vurğulayırlar ki, xüsusilə ətin həddindən artıq yanmış hissələri daha çox təhlükə yaradır. Buna görə də ətin orta temperaturda bişirilməsi və yağın közə damlamasının qarşısının alınması vacib hesab olunur.
Mütəxəssislərin fikrincə, ayda 1 dəfə 100–200 qram kabab istehlakı sağlam insanlarda ciddi risk yaratmır, lakin balanslı qidalanma və tərəvəzlərlə birlikdə qəbul daha təhlükəsiz hesab olunur. /Redaktor.az/
