Barselona Universiteti alimlərinin apardığı yeni araşdırma qozun təkcə yeyilən hissəsinin deyil, adətən tullantı sayılan qabıq və yaşıl örtüyünün də güclü faydalı xüsusiyyətlərə malik olduğunu ortaya qoyub.
Turkustan.az xəbər verir ki, tədqiqatın nəticələri “Food & Function” jurnalında dərc edilib.
Araşdırma zamanı mütəxəssislər qozun müxtəlif hissələrinin – nüvəsinin, sərt qabığının və yaşıl xarici örtüyünün kimyəvi tərkibini analiz ediblər. Məlum olub ki, bioloji aktiv maddələr yalnız yeyilən hissədə deyil, əksər hallarda tullanan hissələrdə də yüksək miqdarda mövcuddur.
Xüsusilə qoz qabığının fenol birləşmələri ilə zəngin olduğu müəyyən edilib. Buraya ellag turşusu və katexinlər daxildir. Bu maddələr güclü antioksidant və iltihabəleyhinə təsirləri ilə tanınır, eyni zamanda sinir hüceyrələrinin qorunmasına kömək edir.
Araşdırma həmçinin yetişməmiş qozun yaşıl örtüyündə yüksək miqdarda karotinoidlərin olduğunu göstərib. Bu piqmentlər hüceyrələri zədələnmədən qoruyur. Xüsusilə beta-karotin immun sisteminin normal fəaliyyəti üçün mühüm rol oynayır.
Qozun nüvəsi isə əsas vitamin E mənbəyi olaraq qalır. Bu vitamin sərbəst radikalların zərərli təsirinə qarşı hüceyrələri qoruyan ən tanınmış təbii antioksidantlardan biridir.
Alimlərin sözlərinə görə, əldə olunan nəticələr qoz emalı zamanı yaranan tullantıların praktik əhəmiyyət daşıya biləcəyini göstərir. Bu materiallardan gələcəkdə qida əlavələri, kosmetik məhsullar və hətta bioloji parçalanan qablaşdırma materiallarının hazırlanmasında istifadə etmək mümkündür.
Tədqiqatçılar qeyd edirlər ki, qozun ümumi kütləsinin təxminən 70 faizi hazırda istifadə olunmur. Buna görə də qabıq və yaşıl örtüyün təkrar emalı həm yeni faydalı maddə mənbələri yarada, həm də istehsal prosesini ekoloji baxımdan daha dayanıqlı edə bilər.
