ABŞ-ın keçmiş dövlət katibi Hillari Klinton bildirib ki, İsrailin baş naziri Binyamin Netanyahu onun vəzifədə olduğu dövrdə İrana hücum etmək və Səudiyyə Ərəbistanı ilə münasibətləri normallaşdırmaq məsələsində “israrlı və qətiyyətli” mövqe sərgiləyib.
Turkustan.az xəbər verir ki, Klinton bu fikirləri Nyu-Yorkda keçirilən tədbirdə “The New Yorker” jurnalının redaktoru Devid Remniklə söhbəti zamanı səsləndirib. O, 2009–2012-ci illər arasında Netanyahu ilə ABŞ-İsrail münasibətlərinə dair gərgin müzakirələr apardığını xatırladıb.
Klintonun sözlərinə görə, Netanyahu İrana hücum məsələsində “amansızcasına israrlı” olub və Vaşinqtondan bu addımı dəstəkləməyi tələb edib.
“Deyirdi ki, ‘İrana hücumda bizi dəstəkləməlisiniz’. Mən də cavab verirdim ki, ‘Uğurlar, amma niyə bunu edirsiniz?’”, – deyə Klinton bildirib.
O, həmçinin İsrailin o dövrdəki müdafiə naziri Ehud Barakla olan telefon danışığını xatırladaraq, İsrail tərəfinin hərbi hazırlıq mesajları verdiyini qeyd edib.
Klinton əlavə edib ki, Netanyahu uzun illərdir İrana qarşı hərbi əməliyyat ideyası ilə yanaşı, region ölkələri ilə, xüsusilə Səudiyyə Ərəbistanı ilə münasibətlərin normallaşdırılmasına da xüsusi maraq göstərib və bu yanaşmanın sonrakı illərdə də davam etdiyini vurğulayıb.
Aytən Yaşar/ Turkustan.az
