Haaretz qəzetinin araşdırmasına görə, nəqliyyat vasitələrinin kəşfiyyatı sahəsində diqqət çəkən şirkətlərdən biri Tokadır.
Turkustan.az xəbər verir ki, şirkətin təsisçiləri arasında İsrailin keçmiş baş naziri Ehud Barak və kibertəhlükəsizlik üzrə keçmiş komandan, təqaüdçü briqada generalı Yaron Rosen da yer alır.
Məlumata görə, şirkət avtomobillərin multimedia sistemlərinə sızaraq gizli dinləmə aparmağa imkan verən texnologiyalar hazırlayıb. Bildirilir ki, bu tip kiberkəşfiyyat fəaliyyətləri hökumətlərdəki yüksək vəzifəli şəxslər tərəfindən həyata keçirilir.
Nəqliyyat vasitələrindən əldə edilən bu cür məlumatlar CARINT (nəqliyyat vasitəsi kəşfiyyatı) adlanır. Hesabatda İsrail şirkətlərinin bu sahədə fəal olduğu qeyd olunur.
Xəbərdə qeyd edilir ki, Toka avtomobillərdə istifadə olunan kameralara çıxış üzrə ixtisaslaşıb və hazırladığı məhsul kamera görüntülərini avtomobillə bağlı digər məlumatlarla uyğunlaşdıra bilir. Şirkətin zamanla texnologiyasını təkmilləşdirərək nəqliyyat vasitələrinin multimedia sistemlərinə uzaqdan sızma, onların hərəkət və yerləşmə məlumatlarını izləmə imkanı yaradan həllər təqdim etdiyi bildirilir.
Məlumata əsasən, bu texnologiya vasitəsilə nəqliyyat vasitəsinin hands-free sisteminin mikrofonuna, tablosuna və ya avtomobilin ətrafında yerləşdirilmiş kameralara uzaqdan giriş mümkün ola bilər. Bildirilir ki, İsrail Müdafiə Nazirliyi Toka məhsullarının satışına icazə verib, lakin şirkət hazırda bu məhsulu satmadığını açıqlayıb.
Aytən Yaşar/ Turkustan.az
