Ceffri Epşteynin Manhettendə yerləşən malikanəsindən əldə edilən yeni fotoşəkillər və arxiv materialları geniş müzakirələrə səbəb olub.
Turkustan.az xəbər verir ki, Epşteynin evində çoxsaylı yüksək profilli şəxslərin fotoşəkillərinin nümayiş etdirilməsi maliyyəçinin qlobal əlaqələr şəbəkəsi ilə bağlı daha əvvəl yayılan məlumatlarla üst-üstə düşərək ciddi tənqidlərə yol açıb. Sözügedən fotoşəkillərin üzə çıxmasından sonra bəzi sosial media istifadəçiləri Səudiyyə Ərəbistanının vəliəhd şahzadəsi Məhəmməd bin Salmanın (MBS) Epşteynlə mümkün əlaqələrini tənqid edərək, bu münasibətlərin Yaxın Şərq və beynəlxalq siyasət kontekstində dəyərləndirilməli olduğunu irəli sürüblər.
Xatırladaq ki, Ceffri Epşteyn 2019-cu ildə azyaşlıların cinsi istismarı və insan alveri ittihamları ilə həbs olunmuş, daha sonra Nyu-Yorkdakı həbsxana kamerasında ölü tapılmışdı. Açıqlanan arxiv materiallarında təkcə fotoşəkillər deyil, həm də Epşteynin geniş sosial və siyasi əlaqələrinə işarə edən sənədlər yer alır.
Dərc olunan fotolarda yalnız MBS-in deyil, eyni zamanda digər beynəlxalq liderlərin və tanınmış iş adamlarının şəkillərinin də olduğu bildirilir. Bu fakt Epşteynin keçmiş ABŞ prezidentləri, biznes dairələri və mədəniyyət xadimləri ilə münasibətləri barədə yeni ehtimalların ortaya çıxmasına səbəb olub.
Ekspertlər qeyd edirlər ki, Epşteynin ölümündən sonra yayımlanan sənədlər məsələni yalnız fərdi əlaqələr çərçivəsindən çıxararaq qlobal siyasət, güc və təsir şəbəkələri ilə bağlı ciddi suallar doğurur. Arxiv materiallarında MBS kimi aktiv siyasi fiqurların adlarının yer alması iddiaların miqyasını daha da genişləndirən amil kimi qiymətləndirilir.
Aytən Yaşar/ Turkustan.az
