Prezident Ərdoğan Azərbaycanın Müstəqillik Günü şənliklərində iştirak etmək üçün Laçına səfərdən qayıdarkən jurnalistlərə açıqlama verib.
Turkustan.az xəbər verir ki, Ərdoğan Rusiya-Ukrayna müharibəsinə də toxunub və bunlarə deyib:
"Bu müharibə təkcə iki ölkəni deyil, həm də qlobal aktorları əhatə edən çox səviyyəli böhrana çevrildi. Bildiyiniz kimi, xarici işlər nazirimiz Hakan Fidan Rusiyada idi. Moskvada keçirilən danışıqlardan sonra bu gün Rusiyanın xarici işlər naziri Sergey Lavrov açıqlama verib. Lavrov Rusiya ilə Ukrayna arasında danışıqların ikinci mərhələsinin İstanbulda keçirilməsini istədiklərini bildirib.
Bu şəkildə İstanbul sülh prosesi inşallah yenidən başlayacaq. Rusiya xarici işlər naziri Lavrovun bu bəyanatı heç də yüngül qəbul edilməməlidir. Bu bəyanat bizim sülhə olan ümidimizi daha da artırdı. Biz sülh üçün səylərimizi davam etdirəcəyik və bundan sonra da çalışacağıq. Biz həm Rusiya, həm də Ukrayna ilə də əlaqə saxlayırıq. Biz əldə etdiyimiz sürəti davamlı sülh üçün bir fürsət kimi görürük. Hər görüşümüzdə bütün həmsöhbətlərimizə xatırladırıq ki, bu fürsəti əldən vermək olmaz. Deyirik ki, qapı aralı olanda bağlamayaq.
Həll daha çox dialoq və daha çox diplomatiya yolu ilədir. Biz bütün diplomatik gücümüzü və potensialımızı sülh üçün istifadə edirik. Rayonumuzda baş verən bu böyük yanğının söndürülməsi həm insani borcdur, həm də ölkəmizin mənafeyinə uyğundur.
Ümid edirəm ki, sülh səylərimiz nəticəsində biz arzuladığımız kompromis əldə edəcəyik. Dörd il ərzində bütün dünya gördü ki, bu müharibə Avropanın təhlükəsizlik arxitekturasını və xüsusən də enerji siyasətini kökündən dəyişib. Avropa Birliyinin enerji sahəsində Rusiyadan asılılığını azaltmaq üçün yeni axtarışları Türkiyə kimi enerji tranzit ölkələrinin də geosiyasi dəyərini artırıb".
Aytən Yaşar/ Turkustan.az
