Deputat Taquhi Tovmasyan Ermənistanın baş nazirinin davranışı ilə bağlı iş başlanılmasını tələb edir.
Turkustan.az Ermənistan mətbuatına istinadən xəbər verir ki, Korrupsiyaya Qarşı Mübarizə Komissiyası deputatın tələbi ilə baş nazir Nikol Paşinyana qarşı "davranış normalarını pozduğu" iddiası əsasında iş açıb.
Deputat bu barədə sosial mediada məlumat verib.
Deputat deyib ki, əvvəllər müraciət etmişdim ki, baş nazirin davranışı ilə bağlı icraat başlansın. Dünən Komissiya mənə bildirib ki, 15 may 2025-ci ildə həqiqətən də icraat başlanıb.
Məlumatda bildirilir ki, Paşinyanın deputatı qıcıqlandıran davranışları bunlar olub:
"Hambal", "Otur, əsəblərimi pozmağı dayandır" ifadələri, “Səni aparıb Milli Təhlükəsizlik Xidmətinin zirzəmilərinə atacağam” hədə-qorxusu və sair hörmətsiz ifadələri.
Deputat müraciətində deyib:
"İctimai məsuliyyəti yüksək olan hər bir məmur bilməlidir ki, onun davranışı və danışığı hüdudsuz ola bilməz. Onlar qanun və əxlaq çərçivəsində qalmalıdırlar.
Nikol Paşinyanın davranışı xalqın hakimiyyətə inamını sarsıdır, institusional tənəzzül risklərini artırır və vətəndaşlarla dövlət arasında münasibətlərin əsasını – hörməti pozur.
Bu cür davranış opponentləri alçaltmaq və demokratik diskursları boğmaq məqsədi daşıyan səlahiyyətdən sui-istifadədir.
Heç bir qanun heç bir məmura, hətta baş nazirə belə, “əsəblərini” və ya “emosiyalarını” əsas gətirərək məsuliyyət çərçivəsindən kənara çıxmaq hüququ vermir.
Ümid edirəm ki, bu iş hüquqi presedentə çevriləcək və CPM-in icraatı formal xarakter daşımayacaq, hətta dövlət daxilində də konstitusiya təsisatlarının hakimiyyət tərəfindən qəbuledilməz davranışlara reaksiya verdiyini təsdiq edən qərarla yekunlaşacaq".
Xatırladaq ki, mayın 7-də parlamentdə hökumət saatında Ermənistanın baş naziri Nikol Paşinyan müxalifətin korrupsiyanın miqyası ilə bağlı sualından sonra əsəbiləşib. Hakimiyyətlə müxalifət nümayəndələri arasında mübahisə başlayıb və iclas müvəqqəti olaraq dayandırılıb./publika.az
