“Bu, növbəti dönməz bəyanatdır ki, onunla sülh prosesinin ən vacib və prinsipial məsələlərindən biri - regional kommunikasiyaların açılması çərçivə səviyyəsində həll olunur və burada bütün prinsipial məsələlər nəzərə alınır”.
Turkustan.az xəbər verir ki, bunu Ermənistan Baş naziri Nikol Paşinyan TRIPP-lə bağlı ABŞ-Ermənistan bəyanatı barədə bildirib.
Baş nazirin sözlərinə görə, bu bəyanatın mənası və praktiki əhəmiyyəti belədir:
“Sülh konkret və praktiki addımlarla respublikamız və bölgəmizdə təsbit olunur. Bu, artıq praktiki reallıqdır.
İstəyirəm siyasi iradəmizi bir daha təsdiqləyim: razılaşdırılmış çərçivələrdə buna hazırıq, mövqeyimiz aydındır və bu istiqamətdə açıq şəkildə irəliləyəcəyik, o cümlədən Azərbaycan ərazisinin əsas hissəsi ilə Naxçıvan Muxtar Respublikası arasında maneəsiz əlaqələrin təmin edilməsi prinsipləri və haqqında dəfələrlə danışdığımız digər mövzular üzrə.
Bizim mövqeyimiz belədir ki, burada da münaqişə məntiqindən çıxmalı və sülhə uyğun mühit və məntiq formalaşdırmalıyıq”.
Paşinyan qeyd edib ki, TRIPP çərçivəsində əldə edilən razılaşmalar mümkün qədər tez de-yure anlaşmalar kimi birləşdirilməlidir:
“Lazımi müqavilə layihələri və hüquqi qərarlar üzərində işləməyə başlamalıyıq. Xüsusilə, Ermənistanda TRIPP adlı şirkət yaradılmalıdır. Həmçinin marşrutlar, inkişaf hüquqları, torpaqdan istifadə və tikinti icazələrini müəyyən etməliyik”.
Ermənistan Baş naziri əlavə edib ki, dövlət strukturları bu gündən başlayaraq qarşıdakı proseslərə hazırlaşmalıdırlar./teleqraf
