Google Finlandiyada süni intellekt (Sİ) infrastrukturunun gücləndirilməsi məqsədilə növbəti iki il ərzində ən azı 13 milyard avro sərmayə yatırmağı planlaşdırır.
Turkustan.az xəbər verir ki, ABŞ-ın texnologiya nəhəngi, həmçinin Finlandiyada Sİ sahəsində çalışacaq 4 400 nəfərin hazırlanması üçün 31 milyon avro vəsait ayıracaq.
Şirkətin məlumatına görə, 2027 və 2028-ci illərdə həyata keçiriləcək layihə Google-ın Avropadakı ən böyük investisiyası olacaq. Sərmayə məlumat mərkəzlərinin tikintisini, elektrik şəbəkəsinin təkmilləşdirilməsini, həmçinin təmiz enerji və batareya layihələrinin həyata keçirilməsini əhatə edir.
Şirkət bildirib ki, bu infrastruktur Google-ın Gemini, Search, Maps və YouTube kimi əsas xidmətlərinə artan qlobal tələbatın qarşılanmasına imkan verəcək.
Google-ın Qlobal İnfrastruktur üzrə vitse-prezidenti Bikaş Koleyin sözlərinə görə, layihənin tikinti mərhələsində Finlandiyada 37 mindən çox iş yerinin dəstəklənməsi gözlənilir.
İnvestisiyanın Finlandiyanın ümumi daxili məhsuluna (ÜDM) ildə təxminən 3,6 milyard avro töhfə verəcəyi proqnozlaşdırılır. Obyektlər tam fəaliyyətə başladıqdan sonra mühəndislik, təhlükəsizlik və əməliyyat sahələri də daxil olmaqla minlərlə daimi iş yeri yaradılacaq.
Aytən Yaşar/ Turkustan.az
