ABŞ prezidenti Donald Tramp Talibana Əfqanıstandan çıxarılma zamanı geridə qalan milyardlarla dollar dəyərində hərbi texnikanı geri qaytarmaq çağırışını təkrarladı.
Turkustan.az xəbər verir ki, Tramp avadanlıqların ABŞ-a qaytarılmalı olduğunu vurğuladı.
ABŞ Müdafiə Nazirliyinin məlumatlarına görə, 2021-ci ildəki geri çəkilmə zamanı Əfqanıstanda təxminən 7 milyard dollar dəyərində hərbi texnika qalıb. Nəqliyyat vasitələri, silahlar və qabaqcıl hərbi sistemlər də daxil olmaqla, bu texnika Taliban tərəfindən ələ keçirilib.
Tramp əvvəllər ABŞ-ın Əfqanıstana maliyyə yardımının bu avadanlığın qaytarılması ilə əlaqələndirilə biləcəyini bildirmişdi. Bu yanaşma Vaşinqtonun Talibana təzyiqi artırmaq strategiyasının bir hissəsi kimi qəbul edilir.
Taliban rejimi indiyə qədər bu tələbi rədd edib. Təşkilat iddia edir ki, sözügedən hərbi texnika ölkənin təhlükəsizliyi üçün zəruridir.
Aytən Yaşar/ Turkustan.az
